జయజయ మహాదేవ శంభో - కాళహస్తి మహాత్మ్యం నుండి ఘంటసాల

"స్వాతంత్ర్యమె మా జన్మ హక్కని చాటండి" అంటున్న మాస్టారు

నిరంకుశులైన తెల్లదొరలు నియంత్రించి పాలించిన భరతావనిలో వారి అరాచకాలను నిర్భయంగా ఎదిరించాం. బానిస బ్రతుకు కన్న మరణమే శరణమనుకున్నారంతా. అందరు ఐకమత్యంతో సన్నిహితులను సంఘటపరచుకుని క్రమశిక్షణతో పోరాడినందుకు ఫలితంగా 1947 ఆగస్టు 15న మనకు స్వాతంత్ర్యం వచ్చింది. అందరి కళ్ళలోను కొంగ్రొత్త ఆశ పొడచూపింది. అయితే ఇంత కష్టపడి తెచ్చుకున్న స్వరాజ్యపు విలువలను విస్మరించాం అందరం. స్వాతంత్రం వచ్చెననీ సభలే చేసి సంబరపడగానే సరిపోదోయి అని అలనాడు మహాకవి శ్రీశ్రీ అన్నారు. ఎన్నో సహజ వనరులుండీ, ఎంతో శ్రామికశక్తి వుండీ సమైక్యత లోపించి స్వార్ధ రాజకీయాలతో మన నేతలు మనకు గోతులు తీసారు. అవినీతి, బంధుప్రీతి, లంచగొండితనం విచ్చలవిడిగా స్వైర విహారం చేసాయి. అయినా ప్రతి ఒక్కరికీ ఏదో ఆశ. రేపటి రోజు బాగుంటుందేమో అని ఎదురుచూపు. దశాబ్దాల నిరంకుశ పాలన నుంచి పునః స్వతంత్రం కోసం ప్రజలు ఎదురుచూస్తున్నారు. స్వాతంత్ర్య దినాన మంచి భవిష్యత్తు కోసం ఆశిద్దాం. అందుకు మాస్టారి మధుర గీతం, తోలేటి రచన ఆ స్పందన ఇస్తుందని ఆశిద్దాం. అలనాటి మేటి స్వాతంత్ర్య సమర శంఖారావం ఈ పాట స్వాతంత్ర్యమె మా జన్మహక్కని చాటండి. విని ఆనందించండి.    

స్వాతంత్ర్య దినోత్సవ శుభాకాంక్షలు

ఆడియో మూలం: ఘంటసాల గాన చరిత

	మూలం:	ప్రైవేట్ సాంగ్
	రచన:	తోలేటి
	సంగీతం:	ఘంటసాల
	గానం:	ఘంటసాల
	పల్లవి:	స్వాతంత్ర్యమె మా జన్మ హక్కని చాటండి..(2)
		నిరంకుశంబగు శక్తులెదిరినా నిర్భయముగ నిదురించండి (2)
		పరుల దాస్యమున బాధలు పొంది బ్రతికిన చచ్చిన భేదమె లేదు (2)
		స్వాతంత్ర్యమె మా జన్మ హక్కని చాటండీ
	చరణం:	కవోష్ణ రుధిర జ్వాలలతోటీ… ఈ..ఈ..
		కవోష్ణ రుధిర జ్వాలలతోటీ స్వతంత్ర్య సమరం నెరపండి (2)
		ఎంతకాలమిటు సహించియున్నా, దోపిడిమూకకు దయరాదన్నా! (2)
		స్వాతంత్ర్యమె మా జన్మ హక్కని చాటండీ..ఈ..ఈ..
	చరణం:	సంఘములోను ఐక్యత వేగమె సంఘట పరుచుము శాంతిపథానా..ఆ…
		సంఘములోను ఐక్యత వేగమె సంఘట పరుచుము శాంతిపథాన
		స్వర్గతుల్యమౌ స్వతంత్ర జ్యోతికీ..ఈ..ఈ..
		స్వర్గతుల్యమౌ స్వతంత్ర జ్యోతికి మాంగల్యపు హారతులిమ్మా!
		మాంగల్యపు హారతులిమ్మా!
		స్వాతంత్ర్యమె మా జన్మ హక్కని చాటండి..(2)

అమ్మా! సరోజినీ దేవి! మా ఘంటసాల గళంలో నీవు చిరకాలం గుర్తుంటావమ్మా మాకు

ఈ రోజు భారత కోకిల గా కీర్తించబడిన శ్రీమతి సరోజినీ నాయుడు 135వ పుట్టిన రోజు నేడు. 1879 ఫిబ్రవరి 13 న హైదరాబాదు లో జన్మించిన సరోజిని తల్లిదండ్రులు  శ్రీమతి వరద సుందరి మరియు శ్రీ అఘోరనాథ్ చటో పాధ్యాయ దంపతులు. సరోజిని తన 13 వ ఏటనే సరోవర రాణి అనే 1300 పంక్తులు గల రచన చేశారట. విదేశము లో విద్యనభ్యసించి తిరిగి వచ్చిన తరువాత ప్రముఖ వైద్య అధికారి శ్రీ గోవిందరాజులు నాయుడును వివాహమాడి సరోజిని నాయుడు అయింది. ఈమె భారత దేశపు మొదటి గవర్నరు. వీరి కుమార్తె పద్మజా నాయుడు కూడ గవర్నరుగా పనిచేసారు. తెలుగింటి కోడలైన సరోజిని స్త్రీజాతికే శిరోమణి వంటిది. స్వాతంత్ర్య సముపార్జనలో మరపురాని పాత్ర వహించి, మహాత్మా గాంధీ ఆశయాలను ఆదర్శంగా తీసుకుని, బ్రిటిష్ శాసనాలను ధిక్కరించిన ధీరోదాత్త చరిత సరోజినీ దేవి. ఆయమ్మ గుర్తుగా గూగుల్ వారు ప్రత్యేక డూడుల్ తయారుచేయడం ముదావహం! సరోజినమ్మ పై ఘంటసాల పాడిన చక్కని గీతం "అమ్మా! సరోజినీదేవి పరిపూర్ణ సువర్ణ కళామయజీవి".  ఘంటసాల గళంలో మన తెలుగింటి ఆడపడుచును ఎల్లప్పుడూ గుర్తుంచుకునే అదృష్టం మనందరిదీ. ఈ పాట రచన తోలేటి, సంగీతం మరియు గానం ఘంటసాల.

Thanks to Sri Vinjamuri Apparao garu for posting the video clip to You Tube

Thanks to Google for Sarojini Naidu's Doodle.

ఆడియో మూలం: ఘంటసాల గాన చరిత

	సాకీ:	అమ్మా! సరోజినీ దేవి!
	పల్లవి:	అమ్మా! సరోజినీ దేవి!
		పరిపూర్ణ సువర్ణ కళామయ జీవి
		అమ్మా! సరోజినీ దేవి!
	చరణం:	స్త్రీజాతి శిరోమణివమ్మ
		మా జాతి గులాబీ రెమ్మ	| స్త్రీజాతి |
		మధురాల వరాల స్వరాలు పల్కు
		మంజుల కోయిలవమ్మా
	చరణం:	స్వారాజ్యత్  సమరకరాసి	| స్వారాజ్య |
		చరితార్థము సద్గుణరాశి
		వర వీరవిహార స్వరాజ్యస్సమర
		ధ్రువతారవు నీవమ్మా
		అమ్మా! సరోజినీ దేవి!
	చరణం:	నీ జీవిత కావ్యాలాపం
		విశ్వానికి ప్రేమ కలాపం
		అనురాగ తరంగ మృదంగ భంగిమల
		అమృతము చిందితివమ్మా!
		అమ్మా! సరోజినీ దేవి!
		అమ్మా! ……. సరోజినీ దేవి!

మధురము శివ మంత్రం మహిలో మరువక - కాళహస్తి మహత్మ్యం చిత్రం నుండి

శ్రీ కాళహస్తీశ్వరుడు 

కాళహస్తి మహాత్మ్యం చిత్రంలోని ప్రతి ఒక్క పాట, ప్రతి ఒక్క పద్యం, ఒక రస గుళిక. ఎంతో అద్భుతంగా గానం చేసి పది కాలాలు నిలిచిపోయేలా చేసారు ఘంటసాల మాస్టారు. ఈ చిత్రం లోని ఇంకొక చక్కని పాట, తోలేటి వెంకట రెడ్డి గారు రచించిన "మధురము శివ మంత్రం". ఇందులో ఘంటసాల గారు ఎన్ని గమకాలు వాడారో చెప్పనక్కరలేదు. ముఖ్యంగా ఈ పాట పల్లవిలో "ఇహ పర సాధనమే" అన్న పంక్తిని అయిదు విధాలుగా ఒక్కోసారి ఒక్కోలా ఆలపిస్తారు.  ఈ చిత్రం తెలుగులో తీసిన చిత్రం కాదు. కన్నడ మూలమైన "బేదర కన్నప్ప" ను తెలుగులోకి డబ్ చేశారు. అయినా మాస్టారి పాటలతో ఇది ఎంతో మనోరంజకంగా భాసించింది. విజయవంతమైంది.

చిత్రం:     కాళహస్తి మహాత్మ్యం (1954)
రచన:     తోలేటి వెంకట రెడ్డి 
సంగీతం: ఆర్. సుదర్శనం, ఆర్.గోవర్ధనం
గానం:     ఘంటసాల

ప.     మధురము శివమంత్రం మహిలో మరువక ఓ! మనసా!      |మధురము|

        ఇహపర సాధనమే....ఏ......ఏ.....

        ఇహపర సాధనమే..

        ఇహపర సాధనమే..

        ఇహపర సాధనమే..

        ఇహపర సాధనమే నరులకు సురుచిర తారకమే                 |ఇహపర|

        ఆగమ సంచారా

        ఆగమ సంచారా, నా స్వాగతమిదె గొనుమా..                      |ఆగమ|

        భావజ సంహారా...

        భావజ సంహారా.....

        భావజ సంహారా... నా నన్ను కావగ రావయ్యా                   |భావజ|

        పాలను ముంచెదవో.. ఓ.. ఓ.. ఓ..

        పాలను ముంచెదవో, మున్నీటను ముంచెదవో..                  |పాలను|

        భారము నీదయ్యా                                                   |భారము|

        పాదము విడనయ్యా, నీ పాదము విడనయ్యా..

        జయహే సర్వేశా!

        జయహే సర్వేశా! సతి శాంభవి ప్రాణేశా!..ఆ..                      |జయహే!|

        కారుణ్య గుణసాగరా!..

        కారుణ్య గుణసాగరా!

        శ్రీకాళహస్తీశ్వరా నన్ను కాపాడవా శంకరా!

        కారుణ్య గుణసాగరా!

        శ్రీకాళహస్తీశ్వరా నన్ను కాపాడవా శంకరా!

        మధురము శివమంత్రం మహిలో మరువక ఓ! మనసా!

        ఇహపర సాధనమే నరులకు సురుచిర తారకమే

రవిశశి నయనా నమో నమో - కాళహస్తి మహాత్మ్యం నుండి

చిత్రం:     కాళహస్తి మహాత్మ్యం (1954)
రచన:     తోలేటి
సంగీతం: ఆర్. సుదర్శనం, ఆర్. గోవర్ధనం
గానం:     బృందం

                                            రవి శశి నయనా నమో! నమో!  
                                            భవభయ హరణా నమో! నమో!
                                            గౌరీ రమణా నమో! నమో! 
                                            కరుణాభరణా నమో! నమో!

                                            రవి శశి నయనా నమో! నమో! 
                                            భవభయ హరణా నమో! నమో!
                                            రవి శశి నయనా నమో! నమో! 
                                            భవభయ హరణా నమో! నమో! 


కృతజ్ఞతలు: యూ ట్యూబ్ వీడియో శ్రీ బోల్లాప్రగడ సోమేశ్వర రావు గారు.

పూజలో పాడుకోవడానికి పార్వతి దేవిపై చక్కని పాట - కాళహస్తి మహత్మ్యం నుండి

కార్తీక మాసం శివునికి అత్యంత ప్రియమైన మాసం. ఈ మాసంలో చాల మంది భక్తులు శివయ్యకు రుద్రాభిషేకాలు చేస్తుంటారు. అయితే ఈ కార్తీక మాసంలో నా బ్లాగులో గరళ కంఠునికి  మాస్టారి గళ గానామృతంతో అభిషేకం చేసాము. మరి అయ్యవారిని అంతగా పొగిడి అమ్మవారిని తలచుకోకపోతే ఎలా? అందుకే శ్రీ పార్వతీ దేవి పై "కాళ హస్తి మహత్మ్యం" నుండి పి.సుశీల చక్కని గొంతులో ఈ భక్తి గీతాన్ని అందిస్తున్నాను.  ఆస్వాదించండి. ఈ పాట పూజలలోను, చిన్న చిన్న పేరంటాలలోను పాడుకోవడానికి చాల చక్కగా వుంటుంది.   

                           చిత్రం:         కాళహస్తి మహత్మ్యం (1954)

                           రచన:         తోలేటి వెంకటరెడ్డి

                           సంగీతం:      ఆర్.సుదర్శనం, ఆర్.గోవర్ధనం

                           గానం:         పి.సుశీల

                   ప.     శ్రీ పార్వతీదేవీ చేకోవె శైలకుమారి

                           మా పూజలే తల్లీ గౌరీ శంకరీ! గౌరీ...శంకరీ

                  చ.     ప్రాపు నీవె పాపహారీ పద్మపత్ర నేత్రీ                 |ప్రాపు నీవె|

                          కాపాడ రావమ్మా! కాత్యాయినీ..                    |కాపాడ రావమ్మా|

                          శ్రీ పార్వతీదేవీ చేకోవె శైలకుమారి

                          మా పూజలే తల్లీ గౌరీ శంకరీ! గౌరీ...శంకరీ

                 చ.     నిన్ను నమ్మినాను తల్లీ అన్నపూర్ణ దేవీ           |నిన్ను నమ్మినాను|

                         పాలించ రావమ్మా పరమేశ్వరీ..                     |పాలించ రావమ్మా|

                         శ్రీ పార్వతీదేవీ చేకోవె శైలకుమారి

                         మా పూజలే తల్లీ గౌరీ శంకరీ! గౌరీ...శంకరీ

దేవా సేవకులన్న (పద్యం) కాళహస్తి మహాత్మ్యం నుండి ఆడియో, సాహిత్యంతో

చిత్రం:      కాళహస్తి మహత్మ్యం (1954)

రచన:      తోలేటి

సంగీతం:  ఆర్.సుదర్శనం, ఆర్.గోవర్ధనం 

గానం:      ఘంటసాల 

                    దేవా.. సేవకులన్న నీచమతులై దీనాళి వేధించు దు

                    ర్భావుల్ యీ నరజాతి, ఈ నరజాతి  పూజకును ఆ... బ్రహ్మాది దేవేంద్ర సత్సే

                    వావ్రాతము వీడీ, భిక్షకుడవై సేవింప యీ బంటుకే

                    ఈవే బంటుగ వచ్చినావు భళిరా... శ్రీకాళహస్తీశ్వరా

                    శ్రీకాళహస్తీశ్వరా... శ్రీకాళహస్తీశ్వరా...

మహేశా పాప వినాశా - సాహిత్యంతో

చిత్రం:         కాళహస్తి మహత్మ్యం (1954)

రచన:         తోలేటి

గానం:         ఘంటసాల

సంగీతం:      ఆర్.సుదర్శనం, ఆర్.గోవర్ధనం  

          ఓమ్

          ఓమ్ నమః శివాయా...

          నవనీత హృదయా.

          తమః ప్రకాశా..

          తరుణేందు భూషా.

          నమో శంకరా! దేవదేవా..

          మహేశా పాపవినాశా కైలాసవాసా ఈశా

          నిన్ను నమ్మినాను రావా నీలకంధరా దేవా

          మహేశా పాప వినాశా కైలాసవాసా ఈశా

          నిన్ను నమ్మినాను రావా నీలకంధరా

          భక్తియేదొ, పూజలేవో తెలియనైతినే                                        |భక్తియేదొ|

          పాపమేదొ, పుణ్యమేదో కాననైతినే దేవా                                   |పాపమేదొ|

          మహేశా పాపా వినాశా కైలాస వాసా ఈశా

          నిన్ను నమ్మినాను రావా నీలకంధరా

          మంత్రయుక్త పూజచేయ మనసు కరుగునా..                             |మంత్రయుక్త|

          మంత్రమో, తంత్రమో ఎరుగనైతినే..                                        |మంత్రమో|

          నాదమేదొ, వేదమేదో తెలియనైతినే                                         |నాదమేదొ|

          వాదమేల పేదబాధ తీర్చరావయా స్వామీ                                 |వాదమేల|

          మహేశా పాప వినాశా కైలాస వాసా ఈశా

          నిన్ను నమ్మినాను రావా! నీలకంధరా

          ఏక చిత్తమున నమ్మిన వారికి శోకము తీర్తువొ రుద్రయ్య         |ఏక చిత్తమున|

          ప్రాతకముగ చిరు వేట చూపి నా ఆకలి దీర్పగ రావయ్య           |ప్రాతకముగ|

          దీటుగ నమ్మితి గనవయ్యా వేట చూపుమా రుద్రయ్యా           |దీటుగ నమ్మితి|

          వేట చూపుమా రుద్రయ్యా, వేట చూపుమా రుద్రయ్యా           |వేట చూపుమా|

పాహీ శంకరా! - కాళహస్తి మహాత్మ్యం - (పద్యాలు)

చిత్రం:      కాళహస్తి మహాత్మ్యం (1954)

రచన:      తోలేటి 

గానం:      ఘంటసాల

సంగీతం:  ఆర్.సుదర్శనం, ఆర్. గోవర్ధనం 

                                         

                         

                            పాహీ శంకరా! మాం పాహీ శంకరా!

                            దీనాళి రక్షించు దేవ దేవా!                          |దీనాళి|

                            నా గతి నీవయ్య దేవ దేవా!                         |నా గతి|

                            పాహీ శంకరా! మాం పాహీ శంకరా!

                            దేవా! దివ్య కృపాకరా భవహరా! దీనావనా శంకరా!

                            నీ వాల్లభ్య బృహంచలామృత ఝరుల్ నీ పుత్రుపై జల్లగా

                            భావాతీత మనోజ్ఞ నేత్రములు విస్ఫారించినావా ప్రభో!

                            సేవా భాగ్యము కల్గజేయుమా దయన్ శ్రీకాళహస్తీశ్వరా!

                            శ్రీకాళహస్తీశ్వరా! 

కాళహస్తి మహత్మ్యం - చేకొనవయ్య మాంసమిదె (పద్యం)

చిత్రం:         కాళహస్తి మహత్మ్యం (1954)

రచన:         తోలేటి

గానం:         ఘంటసాల

సంగీతం:      ఆర్.సుదర్శనం, ఆర్.గోవర్ధనం 

ఆడియో మూలం: పాజక్టు ఘంటసాల

                                  చేకొనవయ్య మాంసమిదె చెల్వుగదెచ్చితి బాస జొప్పునన్

                                  ఆకొనియుంటివేమొ కడుపార బిరాన భుజించవయ్య యీ

                                  లోకులు చూడరయ్య భువిలోని క్షుదార్తుల బాధలెన్నడున్

                                  శ్రీకర కాళహస్తి శశిశేఖర దివ్య కృపాకరా హరా! హరా!

                                  ఆ..ఆ..ఆ..ఆ

కాళహస్తి మహాత్మ్యం - స్వామీ! చంచలమైన చిత్తమిదె - సాహిత్యం

తిన్నడు (కన్నప్ప) మహా శివభక్తుడు. తనను బంధ విముక్తి చేయమని తనకు శివునిపై గల భక్తిని, గుండెలోని ఆర్తిని గొంతులోకి తెచ్చుకుని ఆలపించే సన్నివేశం ఎలా వుంటుందో తెలియాలంటే కాళహస్తి మహాత్మ్యం లో మాస్టారి పద్యాలు వింటే తెలుస్తుంది.  పద్యాలు పాడితే ఘంటసాల గారే పాడాలి. పద్యాలు, శ్లోకాలు పాడటంలో ఒక క్రొత్త వరవడిని సృష్టించి తనకు తానే సాటి అని నిరూపించుకున్న అమర గాయకుడు ఘంటసాల మాస్టారు. ఇక్కడ కాళహస్తి మహాత్మ్యం నుండి మరికొన్ని పద్యాల వీడియో, ఆడియో, మరియు సాహిత్యం యిక్కడ పొందుపరుస్తున్నాను.

వీడియో & ఆడియో మూలం: ప్రాజెక్టు ఘంటసాల

                          చిత్రం:         కాళహస్తి మహత్మ్యం (1954)

                          రచన:         తోలేటి

                          గానం:         ఘంటసాల

                          సంగీతం:      ఆర్. గోవర్ధనం, ఆర్. సుదర్శనం

                          స్వామీ! చంచలమైన చిత్తమిదె నీ జ్ఞానాంజనా రేఖచే

                          నీమంబున్ గొనె నిశ్చలత్వ మొదవెన్ నిండారు నీ భక్తిచే

                          కామ క్రోధ విరోధ వర్గములు చీకాకై నశించెన్, భవ

                          ద్ధామంబౌ రజితాద్రిచేర్చ దయరాదా కాళహస్తీశ్వరా

                          కాళహస్తీశ్వరా...

                          శ్రీకాళహస్తీశ్వరా...

                          ఆ..ఆ...ఆ..ఆ..ఆ

                          చండహుతాసు కీలికలు చయ్యన గ్రక్కుచు దండధారి మా

                          ర్కండునిపై మహోగ్రగతి గ్రక్కునవైచిన కాలపాశమే..

                          గ్రక్కునవైచిన కాలపాశమే

                          తుండెములై, పఠాలుమని తూలిపడెన్, నిను నమ్మువారికీ

                          దండనలేమి లెక్క, రజితాచలవాస మహేశా! ఈశ్వరా!...ఆ..ఆ

                          ధన్యుడనైతిని దేవదేవా (2)

                          ఎన్నడైన మరువనయ్య పాద సేవా

                          ఎన్నడైన మరువనయ్య నీ పాద సేవా

                          పాహీ శంకరా! మాం పాహీ శంకరా!

                          మాం పాహీ శంకరా!

                          పాహిమాం పాహీ శంకరా!

కృతజ్ఞతలు: సాహిత్యం యొక్క ప్రతులు అడగకుండానే అందించిన శ్రీ కొల్లూరి భాస్కర్ (ఘంటసాల సంగీత కళాశాల సంచాలకులు, హైదరాబాద్) గారికి.

ఈ చిత్రం యొక్క ఇతర వివరాలకు, ఆర్ఖైవ్స్ కు "ఘంటసాల గళామృతం - పాటల పాలవెల్లి" మరియు "సఖియా" లో చూడగలరు. 

ఈ చిత్రం లోని దండకం "జయ జయ మహాదేవ శంభో" యింతకు ముందు పోస్టులో చూడగలరు.