నేను చూచిన ఘంటసాల గారి మొదటి ఏనిమేషన్ పాట

ఇది డిజిటలు యుగం. అద్భుతమైన ఊహ, సృజనాత్మకత చూపగలిగే ఆలోచన, సాంకేతిక పరిజ్ఞానం, ప్రేక్షక శ్రోతలు ఆస్వాదించే మంచి ఇతివృత్తం, దానికి తగిన కథా వస్తువు దొరికితే ఓహ్! చెప్పలేనంత వినోదాన్ని కలిగించ వచ్చును. దానికి అపురూపమైన రూప కల్పన ఘంటసాల మాస్టారి పాటకు ఏనిమేషన్ అనే ఆలోచన. యధాలాపంగా యూ ట్యూబ్ లో మాస్టారి పాటలకోసం అన్వేషిస్తుంటే, అనుకోకుండా ఈ ఏనిమేటెడ్ పాట తటస్థించింది. సంతోష్ గారు దీనిని అద్భుతంగా ప్రదర్శించారు. అసలు ఆ ఊహకే జోహార్లు. అది అందరితో పంచుకోవాలని నా బ్లాగులో ఉంచుతున్నాను. సంతోష్ గారు చాల ధన్యవాదాలు. మాస్టారు పాడుతున్నారన్న భావన ఎంతో సంతోషాన్ని కలిగిస్తోంది. అయితే పాట మొదటి చరణం నుండి ప్రారంభం అవుతోంది ఈ వీడియోలో అని గమనించగలరు. ముందు ముందు సంతోష్ గారు మరిన్ని మాస్టారి పాటల్ని ఏనిమేషన్ తో తయారు చేసి ఘంటసాల గారి అభిమానులను అలరిస్తారని ఆశిస్తున్నాను.
   

చిత్రం: భక్త తుకారాం (1973)  
రచన: దేవులపల్లి కృష్ణ శాస్త్రి  
సంగీతం:  ఆదినారాయణ రావు  
గానం: ఘంటసాల

ఏనిమేషన్:   టి. సంతోష్ 

పూజలో పాడుకోవడానికి పార్వతి దేవిపై చక్కని పాట - కాళహస్తి మహత్మ్యం నుండి

కార్తీక మాసం శివునికి అత్యంత ప్రియమైన మాసం. ఈ మాసంలో చాల మంది భక్తులు శివయ్యకు రుద్రాభిషేకాలు చేస్తుంటారు. అయితే ఈ కార్తీక మాసంలో నా బ్లాగులో గరళ కంఠునికి  మాస్టారి గళ గానామృతంతో అభిషేకం చేసాము. మరి అయ్యవారిని అంతగా పొగిడి అమ్మవారిని తలచుకోకపోతే ఎలా? అందుకే శ్రీ పార్వతీ దేవి పై "కాళ హస్తి మహత్మ్యం" నుండి పి.సుశీల చక్కని గొంతులో ఈ భక్తి గీతాన్ని అందిస్తున్నాను.  ఆస్వాదించండి. ఈ పాట పూజలలోను, చిన్న చిన్న పేరంటాలలోను పాడుకోవడానికి చాల చక్కగా వుంటుంది.   

                           చిత్రం:         కాళహస్తి మహత్మ్యం (1954)

                           రచన:         తోలేటి వెంకటరెడ్డి

                           సంగీతం:      ఆర్.సుదర్శనం, ఆర్.గోవర్ధనం

                           గానం:         పి.సుశీల

                   ప.     శ్రీ పార్వతీదేవీ చేకోవె శైలకుమారి

                           మా పూజలే తల్లీ గౌరీ శంకరీ! గౌరీ...శంకరీ

                  చ.     ప్రాపు నీవె పాపహారీ పద్మపత్ర నేత్రీ                 |ప్రాపు నీవె|

                          కాపాడ రావమ్మా! కాత్యాయినీ..                    |కాపాడ రావమ్మా|

                          శ్రీ పార్వతీదేవీ చేకోవె శైలకుమారి

                          మా పూజలే తల్లీ గౌరీ శంకరీ! గౌరీ...శంకరీ

                 చ.     నిన్ను నమ్మినాను తల్లీ అన్నపూర్ణ దేవీ           |నిన్ను నమ్మినాను|

                         పాలించ రావమ్మా పరమేశ్వరీ..                     |పాలించ రావమ్మా|

                         శ్రీ పార్వతీదేవీ చేకోవె శైలకుమారి

                         మా పూజలే తల్లీ గౌరీ శంకరీ! గౌరీ...శంకరీ

తెలుగు చిత్రసీమలో మాస్టారి మొదటి పద్యం "పూనిక రాజవంశమున" - కీలుగుఱ్ఱం చిత్రం నుండి

చిత్రం:         కీలుగుఱ్ఱం (1949)

రచన:         తాపీ ధర్మారావు

సంగీతం:       ఘంటసాల  

గానం:         ఘంటసాల

            

                     పూనిక రాజవంశమున పుట్టిన కన్య

                     పదారు వత్సరాలైనను లేనిదాని

                     నిరామయ జీవిత నష్టభాషలన్ జ్ఞానము కల్గుదాని

                     నొక కార్తిక పౌర్ణమి నర్ధరాత్రిలో

                     నీ నవ చంద్రహాసమున నెవడు భక్తి బలీయజాలునో

                     వానికి కామితార్ధములపారగ నిచ్చెద నేను కాళికన్

                     ఆ..ఆ..ఆ..ఆ..

కృతజ్ఞతలు: ఆడియో మరియు సాహిత్యం - శ్రీ కొల్లూరి భాస్కర రావు గారు,  సంచాలకులు, ఘంటసాల సంగీత కళాశాల, హైదరాబాదు మరియు సలహా మండలి సభులు - ఘంటసాల గాన చరిత. పోస్టరు - శ్రీ బొల్లాప్రగడ సోమేశ్వర రావు గారు.

కాదు సుమా కల కాదు సుమా - కీలుగుఱ్ఱం చిత్రం నుండి ఆడియో, వీడియో, సాహిత్యంతో

నాగేశ్వర రావు, అంజలి

ఘంటసాల గారు ముందుగా రత్నమాల, బాలరాజు చిత్రాలలో కొన్ని పాటలకు సంగీతం సమకూర్చగా, వారు సంపూర్ణంగా సంగీత దర్శకత్వం వహించిన తొలి చిత్రం "కీలుగుఱ్ఱం". దీని నిర్మాణం మరియు దర్శకత్వం శ్రీ మీర్జాపూర్ రాజు గారు నిర్వహించారు. కథ, మాటలు, పాటలు శ్రీ తాపీ ధర్మారావు గారు సమకూర్చారు. ఇది సంగీత, సాహిత్య పరంగా   విజయవంతమైన చిత్రం కూడా. అంతేకాక, అక్కినేని నాగేశ్వర రావు గారి చిత్రాలలో 100 రోజులు ఆడిన చిత్రాలలో ఇది ఒకటి.  ఈ చిత్రంలో ఎక్కువగా పాటలు, కొన్ని పద్యాలు మొత్తం అన్నీ కలిపి దాదాపు పదహారు వున్నాయి. అందులో "కాదు సుమా కల కాదు సుమా" సూపర్ హిట్. ఆ పాట యొక్క ఆడియో, వీడియో, మరియు సాహిత్యం ఇక్కడ పొందు పరుస్తున్నాను.                                                     

               చిత్రం:         కీలుగుఱ్ఱం (1949)

               రచన:         తాపీ ధర్మారావు నాయుడు 

               సంగీతం:      ఘంటసాల

               గానం:         ఘంటసాల, వక్కలంక సరళ 

                సరళ:         కాదు సుమా కల కాదు సుమా             | కాదు సుమా |

                                అమృత పానమును అమర గానమును   | అమృత |

                                అమృత పానమును అమర గానమును

                                గగన యానమును కల్గినట్లుగా

                                గాలిని తేలుచు సోలిపోవుటిది

                                కాదు సుమా కల కాదు సుమా

                ఘంటసాల:   ప్రేమలు పూచే సీమల లోపల...       | ప్రేమలు |

                                వలపులు పారే సెలయేరులలో

                                తేటి పాటలను తేలియాడుటిది

                                కాదు సుమా కల కాదు సుమా

                సరళ:         కన్నె తారకల కలగానముతో          | కన్నె తారకల |

                                వెన్నెల చేరుల ఉయ్యాలలో

                                ఓ.. ఓ.. ఓ.. ఓ.. ఓ.. ఓ..

                                వెన్నెల చేరుల ఉయ్యాలలో

                                ఉత్సాహముతో ఊగుచుండుటిది

                                కాదు సుమా కల కాదు సుమా

                ఇద్దరు:        పూల వాసనల గాలి తెరలలో

                                వలపు చీకటుల వన్నె కాంతిలో    | పూల వాసనల |

                                ఆహహా. ఆ..ఆ ఆహహా. ఆ..ఆ..

                                దోబూచులాడుటిది

                                కాదు సుమా కల కాదు సుమా    | కాదు సుమా |

దేవా సేవకులన్న (పద్యం) కాళహస్తి మహాత్మ్యం నుండి ఆడియో, సాహిత్యంతో

చిత్రం:      కాళహస్తి మహత్మ్యం (1954)

రచన:      తోలేటి

సంగీతం:  ఆర్.సుదర్శనం, ఆర్.గోవర్ధనం 

గానం:      ఘంటసాల 

                    దేవా.. సేవకులన్న నీచమతులై దీనాళి వేధించు దు

                    ర్భావుల్ యీ నరజాతి, ఈ నరజాతి  పూజకును ఆ... బ్రహ్మాది దేవేంద్ర సత్సే

                    వావ్రాతము వీడీ, భిక్షకుడవై సేవింప యీ బంటుకే

                    ఈవే బంటుగ వచ్చినావు భళిరా... శ్రీకాళహస్తీశ్వరా

                    శ్రీకాళహస్తీశ్వరా... శ్రీకాళహస్తీశ్వరా...

మహేశా పాప వినాశా - సాహిత్యంతో

చిత్రం:         కాళహస్తి మహత్మ్యం (1954)

రచన:         తోలేటి

గానం:         ఘంటసాల

సంగీతం:      ఆర్.సుదర్శనం, ఆర్.గోవర్ధనం  

          ఓమ్

          ఓమ్ నమః శివాయా...

          నవనీత హృదయా.

          తమః ప్రకాశా..

          తరుణేందు భూషా.

          నమో శంకరా! దేవదేవా..

          మహేశా పాపవినాశా కైలాసవాసా ఈశా

          నిన్ను నమ్మినాను రావా నీలకంధరా దేవా

          మహేశా పాప వినాశా కైలాసవాసా ఈశా

          నిన్ను నమ్మినాను రావా నీలకంధరా

          భక్తియేదొ, పూజలేవో తెలియనైతినే                                        |భక్తియేదొ|

          పాపమేదొ, పుణ్యమేదో కాననైతినే దేవా                                   |పాపమేదొ|

          మహేశా పాపా వినాశా కైలాస వాసా ఈశా

          నిన్ను నమ్మినాను రావా నీలకంధరా

          మంత్రయుక్త పూజచేయ మనసు కరుగునా..                             |మంత్రయుక్త|

          మంత్రమో, తంత్రమో ఎరుగనైతినే..                                        |మంత్రమో|

          నాదమేదొ, వేదమేదో తెలియనైతినే                                         |నాదమేదొ|

          వాదమేల పేదబాధ తీర్చరావయా స్వామీ                                 |వాదమేల|

          మహేశా పాప వినాశా కైలాస వాసా ఈశా

          నిన్ను నమ్మినాను రావా! నీలకంధరా

          ఏక చిత్తమున నమ్మిన వారికి శోకము తీర్తువొ రుద్రయ్య         |ఏక చిత్తమున|

          ప్రాతకముగ చిరు వేట చూపి నా ఆకలి దీర్పగ రావయ్య           |ప్రాతకముగ|

          దీటుగ నమ్మితి గనవయ్యా వేట చూపుమా రుద్రయ్యా           |దీటుగ నమ్మితి|

          వేట చూపుమా రుద్రయ్యా, వేట చూపుమా రుద్రయ్యా           |వేట చూపుమా|