తెలుగువారికి శ్రీ శ్రీ సందేశం - 'అనగనగా ఒక రాజు' డబ్బింగ్ చిత్రం నుండి ఘంటసాల గళంలో

1958 లో నిర్మించబడిన "నడోడి మన్నన్‌" (The Vagabond King) అనే తమిళ చిత్రాన్ని తెలుగులో "అనగాఅనగా ఒక రాజు" గా డబ్బింగు చేశారు. ఈ చిత్రం ఆరోజుల్లో రూపొందిన అతి పెద్ద చిత్రం. ఇది 5 గంటల సినిమా. అయితే కొంత ఎడిటింగ్ చేసాక 3.5 గంటలకు వచ్చింది.   ఎం.జి.రామచంద్రన్ దర్శకత్వంలో ఆయన ద్విపాత్రాభినయంతో పి.భానుమతి, బి.సరోజాదేవి తో కలసి నటించిన ఈ చిత్రానికి ఘంటసాల ఒక పాట పాడారు. దీనిని మహాకవి శ్రీ శ్రీ వ్రాసారు. సందేశాత్మక గీతాలు వ్రాయడం లో శ్రీశ్రీది అందె వేసిన చెయ్యి. డబ్బింగ్ పాటలో కూడ తన పదాల వాడిని తెలుగువాడికి చూపించి ప్రభావితుడ్ని చేశారు ఆయన. ఈ చిత్రం కోసం శ్రీశ్రీ వ్రాసిన "సుఖపడుటే సుఖమై పరుగిడ నీజన్మం" అన్న పాటలోని భావం అక్షర సత్యం. అయితే ఇది మరుగున పడి వున్న ఒక ఆణి ముత్యం. తమిళంలో ఈ పాటను గోవిందరాజన్‌ పాడారు. అయితే చలన చిత్ర శైశవ దశలో శ్రీ శ్రీ ఎక్కువగా డబ్బింగ్ చిత్రాలకు పాటలు వ్రాసేవారు. తరువాత ప్రముఖులు రాజశ్రీ.  అయితే డబ్బింగు పాటలకుండే ఇబ్బందులు పద విచ్చేదనలో స్పష్టంగా తెలుస్తాయి. ఉదాహరణకు - కల్మి, కాన్‌పడదు, కాల్లు చేతుల్ మొదలయినవి. అవి పెదవుల కదలికలకు కూడ అతికినట్టు ఉండాలి మరి.ఈ చిత్రానికి సంగీత దర్శకులు టి.ఎం.ఇబ్రహీం. అయితే తమిళ చిత్రానికి సంగీత దర్శకులు ఎస్.ఎం.సుబ్బయ్యనాయుడు (సంగీతయ్య).

వీడియో మూలం: ఘంటసాల గానామృతం

	చిత్రం:	అనగాఅనగా ఒక రాజు (1959)
	రచన:	శ్రీ శ్రీ
	గానం:	ఘంటసాల
	సంగీతం:	టి.ఎం.ఇబ్రహిం
	పల్లవి:	సుఖపడుటే సుఖమై పరుగిడ నీ జన్మం
		శోకాలు తెచ్చేనోయ్ తెలుగోడా!	| సుఖపడుటే |
		సుఖపెట్టుటే గుణమై పరగిన నీ జన్మం - 2
		లోకాలు మెచ్చేనోయ్ తెలుగోడా!	| సుఖపెట్టుటే |
	చరణం:	కల్మినెంతో మెచ్చి గర్వించ నీ జన్మం
		కలత పడు చూడూ తెలుగోడా!	| కల్మినెంతో |
		అల్లాడు పేదలను సేవింప యిలయందే	| అల్లాడు |
		కాన్‌పడదా స్వర్గం తెలుగోడా!	| కాన్‌పడదా |
	చరణం:	ఘనమైన కాల్లు చేతుల్ కల్గియుండె బిచ్చమునెత్తు	| ఘనమైన |
		జన్మ దుఃఖాల చేసే తెలుగోడా! -2
		అందరు పనిచేసి ఆ ఫలమున్‌ పొంద
		అద్భుతమౌను జన్మం తెలుగోడా!	| అందరు |
		అద్భుతమౌను జన్మం తెలుగోడా!
	చరణం:	బ్రతుకంతా పదవి జొరబడితే జన్మం	| బ్రతుకంతా |
		హీనమయ్యేనయ్యా తెలుగోడా!	| హీనమయ్యే |
		ఉసురిచ్చి తల్లి నేలన్‌..ఆ..ఆ..ఆ..
		ఉసురిచ్చి తల్లి నేలన్‌ గౌరవించితే జన్మం	| ఉసురిచ్చి |
		లోకాలు మెచ్చేనోయ్ తెలుగోడా!	| లోకాలు |

కృతజ్ఞతలు: ఆడియోను పొందుపరచిన సఖియా.కామ్ వారికి, వివరాలు సమకూర్చిన వికిపీడియా మరియు ఘంటసాల గళామృతము పాటల పాలవెల్లి బ్లాగులకు హృదయపూర్వక ధన్యవాదములు. 

పలుశివ క్షేత్రాలను వర్ణించే ఘంటసాల పాట 'ఈశా గిరీశా మహేశా' - దేవకన్య చిత్రం నుండి

అమృతం కోసం కోలాహలంగా దేవ-దానవులు క్ష్రీరసాగర మథనం జరిపినపుడు ముందు హాలాహలం పుట్టింది. దాని భీకరజ్వాలను ఎవ్వరూ తట్టుకోలేకపోయారు. అందరూ కలసి  భూతనాథుని వేడుకున్నారు.  పరమశివుడు ఆ హాలాహలాన్ని మ్రింగి గళమున బంధించి నీలకంఠుడై మూర్ఛిల్లాడు.  శివుని జాగృతికి తేవడానికి అభిషేకాలు, పూజలు చేసి అందరూ జాగరణ చేశారు. ఈ రాత్రే శివరాత్రి.    శివుడు పంచ వక్త్రుడు. రుద్రస్వరూపుడు. శివునికి ద్వాదశ జ్యోతిర్లింగాలున్నాయి. ఇందులో ఎక్కువ శాతం ఉత్తర భారత దేశంలో ఉన్నాయి. జ్యోతిర్లింగాలలో ఆంధ్రప్రదేశ్ లో శ్రీశైలం ఒకటి. శివలింగాలు పంచభూతాల రూపంలో పృథ్వి, జల, వాయు, ఆకాశ, తేజో లింగాలు - అవి పృథ్వీ లింగం (కంచి), జల లింగం (జంబుకేశ్వరం), వాయు లింగం (శ్రీకాళహస్తి), ఆకాశ లింగం (చిదంబరం), తేజో లింగం (అన్నామలై) గా ఆయా శివ క్షేత్రాలలో వెలసాయి.  అలాగే శివునికి పంచ ఆరామములు గల ఐదు పుణ్యక్షేత్రాలు ఆంధ్రప్రదేశ్ లో వున్నాయి. అవి అమరారామము (అమరావతి, గుంటూరు), ద్రాక్షారామము (ద్రాక్షారామం, తూర్పు గోదావరి), కుమారారామము (సామర్లకోట), భీమారామము (భీమవరం), క్షీరారామము (పాలకొల్లు).  ఈ శివక్షేత్రాలలోని కొన్నింటిని 1968 లో విడుదలయిన  'దేవకన్య' చిత్రం కోసం "ఈశా గిరీశా మహేశా!" పాటలో చక్కగా వర్ణించారు అలనాటి ప్రముఖ రచయిత వీటూరి. ఈ చిత్రానికి సంగీతం టి.వి.రాజు. గానం ఘంటసాల. ఈ శివరాత్రికి  శివుని ప్రార్థించే ఈ గీతం యొక్క దృశ్య, శ్రవణ ఖండికలను విని చూసి ఆనందించండి. 

శివరాత్రి శుభాకాంక్షలు!

	చిత్రం:	దేవ కన్య (1968)
	రచన:	వీటూరి
	గానం:	ఘంటసాల
	సంగీతం:	టి.వి.రాజు
	పల్లవి:	ఈశా గిరీశా మహేశా!
		జయ కామేశ కైలాస వాసా!	| ఈశా |
		ఈశా గిరీశా మహేశా!
	చరణం:	గంగా తరంగాల కలుషాలు మాపే
		కాశీ పురాధీశ విశ్వేశ్వరా!	| కాశీ |
		మోక్షద్వారము దాక్షారామము
		భవభయదూరా భీమేశ్వరా!	| భవ |
	చరణం:	భక్తవశంకర భ్రమరాంబికావర
		శ్రీకర శ్రీశైల మల్లీశ్వరా!	| శ్రీకర |
		వాయులింగా స్మరదర్పభంగా
		ధవళాంగ శ్రీకాళ హస్తీశ్వరా!	|ధవళాంగ |
	చరణం:	కాంచీపురీవర ఏకాంబరేశ్వర
		కామేశ్వరీ వామభాగేశ్వరా!
		శ్రీ సుందరేశ మీనాక్షీ మనోజ
		నమో! చిదంబర నటరాజా!	| నమో |
	చరణం:	కరుణేందు శేఖర అరుణాచలేశ్వర
		సాకార ఓంకార అమలేశ్వరా
		శ్రితజన మందార కేదారేశ్వరా!
		రామ ప్రతిష్టిత సైకతలింగా ఆ..ఆ..
		రమ్య శుభాంగా రామలింగా	| రమ్య |
		శ్రీ రామలింగా ఆ రామలింగా -3

Thanks: To TeluguOne for up loading the video to You Tube and Wikipedia for the useful information and to Ghantasala Galamrutamu blog for the background information.