ఘంటసాల సంగీతంపై అవధానం - శ్రీమతి రాధాకుమారి గారికి శ్రద్ధాంజలి

శ్రీమతి రాధా కుమారి

22-4-2012 న హైదరాబాదు చిక్కడపల్లి త్యాగరాయ గానసభ లో ఘంటసాల సంగీత సాహిత్య సామాజిక సంస్థ "చైతన్య భారతి" అధ్వర్యంలో అలనాటి చలనచిత్ర నటి, శ్రీ రావి కొండలరావు గారి సతీమణి శ్రీమతి రాధా కుమారి గారి శ్రద్ధాంజలి లో భాగంగా ఘంటసాల మాస్టారి పాటలు, సంగీతం, చిత్రాల విశేషాలపై అవధానం జరిగింది. దీనిలో పలువురు పృచ్ఛకులు పాల్గొన్నారు. వారు అడిగిన ప్రశ్నలకు అవధాని శ్రీ సయ్యద్ రహమతుల్లా గారు అదే వరుస క్రమంలో సమాధానాలు చెప్పారు. దాదాపు అరగంటకు పైగా జరిగింది ఈ కార్యక్రమమం. ఈ కార్యక్రమంలో పాల్గొన్న పృచ్చకులు - భవానీ దేవి, కమలశ్రీ, అక్కిరాజు సుందర రామకృష్ణ, ముదిగొండ శివ ప్రసాద్, గుండు హనుమంత రావు, రామారావు, ఇల్లిందల హేమ సుందర్, డా.విజయ్ కుమార్, తాతా బాల కామేశ్వర రావు, లక్ష్మయ్య, శ్రీనివాస రావు, రామచంద్ర రావు, ఆంజనేయులు, వడ్డాది రామకృష్ణ, ఎమ్.వి. అనూరాధ, స్వర్ణ కుమార్,  పెళ్లూరి శ్రీరామకృష్ణ మూర్తి, అరవింద, నూకల ప్రభాకర్ గార్లు.

అక్కిరాజు రామకృష్ణ గారు శ్రీమతి రాదా కుమారి గారి గురించి చెప్పిన పద్యం - 

"మొన్న నిన్నటి దాక మాముందె నిలచి 

ఆటపాటల నడయాడినట్టి నీవు 

మాయమైతివి సోదరీ! మమ్ము వదలి, 

ఎడను దుఃఖంబు పొంగగా యిచ్చుచుంటి 

నీకు అశ్రుతర్పణము రాధాకుమారి". 

Thanks to TeluguOne for uploading the Video

ఘంటసాల, పిఠాపురం కలసి పాడిన అరుదైన పాట - ఉమా సుందరి చిత్రం నుండి

1956 లో జూపిటర్ పిక్చర్స్ పతాకం పై విడుదలయిన జానపద, భక్తి  చిత్రం ఉమా సుందరి. ఇందులో ఎన్ .టి.ఆర్., జూనియర్ శ్రీరంజని నటించారు. చిత్తూరు వి..నాగయ్య, కన్నాంబ, రేలంగి, సురభి బాల సరస్వతి ఇతర తారాగణం. సంగీతం అశ్వద్ధామ. పాటలు పద్యాలు సదాశివ బ్రహ్మం రచన. దర్శకత్వం పి.పుల్లయ్య. ఈ చిత్రంలో నాగభూషణం మరియు ఎన్.టి.ఆర్.లపై చిత్రీకరించిన ఒక వేదాంత గీతాన్ని అలనాటి ప్రముఖ హాస్య గాయకులు పిఠాపురం నాగేశ్వర రావు, ఘంటసాల మాస్టారు పాడారు. వీరిద్దరూ కలసి పాడినవి ఏడు పాటలు. అందులో అవేకళ్ళు, దసరా బుల్లోడు చిత్రాల లో రెండు-మూడున్నాయి. ఉమా సుందరి చిత్రంలో వీర రాయల మహారాజు (ఎన్.టి.ఆర్.) కరువు కాటకాలతో దేశం దుర్భిక్షం కాగా, రాజ్యం వదలి అడవులపాలవుతాడు. పరమ శివుడు (నాగభూషణం) ఒక పిచ్చివాడి వేషంలో అతనికి తారస పడతాడు.  వారిరువురి మధ్య సాగిన తత్వ సారమే ఈ పాట. ఈ పాత్రలో నాగభూషణం నటన అపూర్వం. ఈ చిత్రంలో మాస్టారు కొన్ని పద్యాలు కూడా పాడారు. ఈ చిత్రాన్ని ఈ లింకులో చూడవచ్చును.

	చిత్రం:	ఉమా సుందరి (1956)
	రచన:	సదాశివ బ్రహ్మం
	సంగీతం:	అశ్వద్దామ
	గానం:	ఘంటసాల, పిఠాపురం
పల్లవి:	పిఠాపురం:	నమ్మకురా ఇల్లాలు పిల్లలు బొమ్మలురా జీవా
		తోలు బొమ్మలురా జీవా..ఆ..ఆ..
	ఘంటసాల:	నమ్మకురా ఇల్లాలు పిల్లలు బొమ్మలురా జీవా
		తోలు బొమ్మలురా జీవా..ఆ..ఆ..
	పిఠాపురం:	సమ్మతించి నను నమ్మిన వారికి సాయుజ్యమురా జీవా..
	ఘంటసాల:	శివ సాన్నిధ్యమురా జీవా
	పిఠాపురం:	సమ్మతించి నను నమ్మిన వారికి సాయుజ్యమురా జీవా..
	ఘంటసాల:	శివ సాన్నిధ్యమురా జీవా
చరణం:	పిఠాపురం:	ఘోర దురిత సంసార జలధిలో జ్ఞానమె చేయూత
		అజ్ఞానమె ఎదురీత ఆ..ఆ..
	ఘంటసాల:	జీవా.. జ్ఞానమె చేయూత అజ్ఞానమె ఎదురీత ఆ..ఆ..
	పిఠాపురం:	ఘోర దురిత సంసార జలధిలో జ్ఞానమె చేయూత
		అజ్ఞానమె ఎదురీత ఆ..ఆ..
	ఘంటసాల:	జీవా.. జ్ఞానమె చేయూత అజ్ఞానమె ఎదురీత ఆ..ఆ..
చరణం:	పిఠాపురం:	మోహమెందుకీ దేహము పై ఇది తోలు తిత్తిరా జీవా..
		ఉత్త గాలి తిత్తిరా జీవా..
	ఘంటసాల:	మోహమెందుకీ దేహము పై ఇది తోలు తిత్తిరా జీవా..
		ఉత్త గాలి తిత్తిరా జీవా..
	ఇద్దరు:	నమ్మకురా ఇల్లాలు పిల్లలు బొమ్మలురా జీవా
		తోలు బొమ్మలురా జీవా..ఆ..ఆ..

Thanks to "Tollywood for providing the you tube video. Thanks to Sri Someswararao Bollapragada for providing the poster of the movie. Also, thanks to wikipedia for the information.