తగునా వరమీయ - భూకైలాస్ నుండి ఘంటసాల

తగునా వరమీయ - భూకైలాస్ నుండి

ఎ.వి.ఎం. సంస్థ ఎన్నో ప్రతిష్టాత్మకమైన చిత్రాలను నిర్మించింది. అయితే అందులో ఎక్కువ సాంఘిక చిత్రాలు. ఆ సంస్థ 1958 లో నిర్మించిన విలక్షణమైన పౌరాణిక చిత్రం భూకైలాస్. శివుని ఆత్మలింగం కోసం రావణాసురుని తపస్సు, మొదటి ప్రయత్నంలో రావణుని నారదుడు తప్పుదారి పట్టించి మండోదరితో వివాహం జరిపించడం, రెండవ ప్రయత్నంలో శివకటాక్షంతో ఆత్మలింగం పొంది లంకకు తిరిగి వస్తుండగా, బాలుని రూపంలో వినాయకుడు వచ్చి ఆత్మలింగాని నేలపైనుంచడం, అందువలన ఆతంలింగాన్ని రావణుడు పొందలేక ఆచోటే భూకైలాస్ గా ప్రసిద్ధి చెండడం ఈ చిత్రం యొక్క మూల కథ. రావణాసురునిగా ఎన్‌.టి.ఆర్, నారదునిగా ఎ.ఎన్‌.ఆర్., మరియు మండోదరి తండ్రి మయాసురునిగా ఎస్.వి.ఆర్. వంటి అగ్రనటులు నటించిన ఈ చిత్రానికి ఆర్.సురర్శనం, ఆర్.గోవర్థనంల సంగీత దర్శకత్వంలో అమర గాయకుడు ఘంటసాల గళంలో జీవంపోసుకున్న సముద్రాల రాఘవాచార్య అద్భుత రచనలు ఆయువుపట్టు. ఈ కార్తీక సోమవారం నాడు ఈ చిత్రంలోని ఘంటసాల పాట 'తగునావరమీయ' సమర్పిస్తున్నాను.

Thanks to Rose Telugu Movies for uploading the video clip to You Tube

	చిత్రం:	భూకైలాస్ (1958)
	రచన:	సముద్రాల రాఘవాచార్య (సీనియర్)
	సంగీతం:	ఆర్.సుదర్శనం, ఆర్.గోవర్ధనం
	గానం:	ఘంటసాల
	ప.	తగునా.ఆ..ఆ.. వరమీయా.ఆ..ఆ. యీ నీతిదూరునకు పరమాపాపునకు
		తగునా.ఆ..ఆ.. వరమీయా.ఆ..ఆ. యీ నీతిదూరునకు పరమాపాపునకు
	చ.	స్నేహము మీరగ నీవేలగ ద్రోహమునే జేసితీ-2
		పాపకర్ము దుర్మదాంధు నన్ను ఏపక దయచూపితేల అర
		తగునా వరమీయా యీ నీతిదూరునకు పరమపాపునకు
	చ.	మంగళదాయిని మాత పార్వతిని మతిమాలి మోహించితీ..ఈ..
		మంగళదాయిని మాత పార్వతిని మతిమాలి మోహించితీ
		కన్నుల నిండే శూలాన పొడిచీ కామము మాపుమా..ఆ.
		కన్నుల నిండే శూలాన పొడిచీ కామము మాపుమా
	చ.	తాళజాలను సలిపిన ఘనపాప సంతాపభర మేనిక
		చాలును, కడతేర్చుము ఇకనైన వీని పుణ్యహీన దుర్జన్మము
		పోనాడితి మతి, వేరేగతి మరిలేదు
		ఈ నీచుని తల ఇందే తునకలు కానీ
		మేనియ్యెడ వసివాడీ, మాడీ మసిమసిగానీ
		పాపము బాపుమా, నీ దయా చూపుమా, నీ దయ చూపుమా
	చ.	చేకొనుమా దేవా శిరమూ, చేకొనుమా దేవా శిరమూ చేకొనుమా దేవా
		శిరము చేకొనుమా దేవా, శిరము చేకొనుమా ..ఆ దేవా
		చేకొనుమా దేవా, శిరమూ చేకొను మహాదేవా
		మాలికలో మణిగా నిలుపు కంఠమాలికలో మణిగా నిలుపు
		నా పాప ఫలము తరుగు, విరుగూ..ఊ..
		పాప ఫలము తరుగు, విరుగు ఊ., పాప ఫలము తరుగూ..ఊ విరుగు
		చేకొనుమా దేవా, శిరమూ చేకొను మహాదేవా

నీలకంధరా దేవా! దీనబాంధవా రావా!

ప్రతిష్టాత్మకైన చిత్ర నిర్మాణ సంస్థ ఎ.వి.ఎమ్‌. (ఎ.వి.మెయ్యప్పన్) నిర్మించిన భక్తిరస చిత్రం భూకైలాస్ (1958).  ముగ్గురు అగ్రనాయకులు - ఎన్‌.టి.ఆర్. (రావణుడు), ఎ.ఎన్‌.ఆర్. (నారదుడు) మరియు ఎస్.వి.ఆర్. (మయాసురుడు) లు నటించిన ఈ చిత్రం లో జమున మండోదరి గా, బి.సరోజా దేవి పార్వతిగా నటించారు.  రావణాసురుడు శివుని ప్రసన్నం చేసుకుని ఆత్మలింగాన్ని వరంగా పొంది లంకకు బయలుదేరుతాడు. దానిని అతనికి దక్కకుండా గణపతి అడ్డుకుని నేలపై మోపి లంక చేరకుండ సఫలీకృతుడవుతాడు. ఆ శివలింగం ప్రతిష్టించబడిన స్థలమే భూకైలాసం గా పేరు పొందుతుంది.  ఈ చిత్రానికి సంగీతం ఇద్దరు అన్నదమ్ములు ఆర్.సుదర్శనం మరియు ఆర్.గోవర్ధనం సమకూర్చారు.  అన్ని పాటలూ సూపర్ హిట్టే.  ఈ చిత్రంలో ఘంటసాల మాస్టారు శివునిపై చక్కని పాటలు - దేవదేవ ధవళాచల మందిర, నీలకంధరా దేవా! మొదలయినవి, ఎన్నో చక్కని పద్యాలు గాగానం చేశారు.

	చిత్రం:	భూకైలాస్ (1958)
	రచన:	సముద్రాల రాఘవాచార్య (సీనియర్)
	సంగీతం:	ఆర్.సుదర్శనం, ఆర్.గోవర్ధనం
	గానం:	ఘంటసాల
	సాకీ:	జయ జయ మహాదేవ శంభో సదాశివా...
		ఆశ్రిత మందారా శృతిశిఖర సంచారా...
	పల్లవి:	నీలకంధరా దేవా! దీనబాంధవా రారా! నన్నుగావరా	| నీలకంధరా|
		సత్యసుందరా స్వామీ, నిత్యనిర్మలా పాహీ	| సత్యసుందరా |
		నీలకంధరా దేవా! దీనబాంధవా రారా! నన్నుగావరా
	చరణం:	అన్యదైవము గొలువా...ఆ..ఆ..ఆ..ఆ..
		అన్యదైవము గొలువా నీదుపాదము విడువా	| అన్య దైవమూ |
		దర్శనమ్మునీరా మంగళాంగ గంగాధరా	| దర్శనమ్ము |
		నీలకంధరా దేవా! దీనబాంధవా రారా! నన్నుగావరా
	చరణం:	దేహియన వరములిడు దానగుణసీమా
		పాహియన్నను ముక్తినిడు పరంధామా
		నీమమున నీ దివ్యనామ సంస్మరణా
		ఏమరక చేయుదును భవతాపహరణా
		నీ దయామయ దృష్టి దురితమ్ములారా
		వరసుధావృష్టి నా వాంఛలీడేరా
		కరుణించు పరమేశ దరహాసభాసా
		హరహర మహాదేవ కైలాసవాసా… కైలాసవాసా..
	చరణం:	ఫాలలోచన నాదు మొరవిని జాలిని పూనవయా
		నాగభూషణ నన్ను కావగ జాగును సేయకయా	| ఫాలలోచన |
		కన్నులనిండుగ భక్తవత్సల కానగ రావయ్యా	| కన్నుల |
		ప్రేమమీర నీదు భక్తుని మాటను నిల్పవయా	| ప్రేమమీర |
		ఫాలలోచన నాదు మొరవిని జాలిని పూనవయా
		నాగభూషణ నన్ను కావగ జాగును సేయకయా
		శంకరా శివశంకరా అభయంకరా విజయంకరా - 3

శివరాత్రి శుభాకాంక్షలతో "దేవ దేవ ధవళాచల మందిర"

ఘంటసాల మాస్టారు ఎన్.టి.ఆర్. కు ఎ.ఎన్.ఆర్.కు పాడేటప్పుడు గొంతులో చక్కని వైవిధ్యం చూపించేవారు. అయితే ఇద్దరికీ ఒకే పాటలో నేపథ్య గానం చేసిన పాటలు తక్కువ. అందులో చెప్పుకోదగినది "భూకైలాస్" చిత్రంలోని "దేవదేవ ధవళాచల మందిర గంగాధరా హర నమో నమో". స్థల పురాణం ప్రకారం ప్రకారం శివుని వరంతో ఆత్మలింగాన్నిసంపాదించి లంకలో స్థాపించవలెనని బయలుదేరిన రావణాసురుని వినాయకుడు యుక్తితో మార్గ మధ్యంలో బాలుని రూపంలో అడ్డుకుని  గోకర్ణ క్షేత్రం వద్ద ఆ లింగాన్ని నేలపై మోపించి లంకాదీశ్వరునికి దక్కకుండా చేసే కథాంశం తో నిర్మింప బడిన చిత్రమిది. ఈ చిత్రంలో పరమశివుని కి అత్యంత ప్రియ భక్తుడైన రావణుడు (ఎన్.టి.ఆర్.) పాడగా చివరలో నారదుడు (ఎ.ఎన్.ఆర్.) అందుకుంటాడు. మాస్టారు ఇద్దరు నటులకూ ఒకే పాటలో పాడినా, ఆయన ఎవరికి పాడుతున్నారో కళ్ళు మూసుకుని విని చెప్పొచ్చు.  ఈ రోజు శివరాత్రి.  ఈ సంవత్సరం శివునికి ప్రీతి కలిగించే రోజైన సోమవారంనాడు ఈ పర్వదినం రావడం మన అదృష్టం. అయితే సోమ లేదా సోముడు అంటే చంద్రుడు కదా!, ఆ పేరున వచ్చేది సోమవారం (moon-Monday), మరి శివునికి సోమకు ఏమిటి సంబంధం?  ఈ ప్రశ్నకు ఒకసారి బ్రహ్మశ్రీ సామవేదం షణ్ముఖ శర్మ గారు చక్కని భాష్యం చెప్పారు. "సోమ" = "స + ఉమ", అంటే ఉమతో కూడియున్నవాడు అని. ఈ పాటను శివరాత్రి కానుకగా మాస్టారి అభిమానులకు దృశ్య, సాహిత్యాలతో ఇక్కడ పొందుపరుస్తున్నాను. 

వీడియో మూలం: ఘంటసాల గానామృతం

చిత్రం:         భూకైలాస్ (1958)

రచన:         సముద్రాల రాఘవాచార్య

సంగీతం:      ఆర్.సుదర్శనం, ఆర్.గోవర్ధనం

గానం:         ఘంటసాల

ప.             దేవదేవ ధవళాచలమందిర గంగాధరాహర నమో! నమో!

                దైవతలోక సుధాంబుధి హిమకర లోకశుభంకర నమో! నమో!         | దేవదేవ |

అ.ప.      పాలితకింకర భవనాశంకర శంకర పురహర నమో! నమో!               | పాలిత కింకర |

                హాలాహలధర శూలాయుధకర శైలసుతావర నమో! నమో!            | హాలాహలధర |

                దేవదేవ ధవళాచల మందిర గంగాధరా హర నమో! నమో!

                దైవతలోక సుధాంబుధి హిమకర లోకశుభంకర నమో! నమో!

చ.             దురిత విమోచనా.. ఆ.. ఆ.. ఆ.. ఆ.. ఆ.. ఆ..

                దురిత విమోచన ఫాలవిలోచన పరమదయాకర నమో! నమో

                కరిచర్మాంబర చంద్రకళాధర సాంబ దిగంబర నమో! నమో               | కరిచర్మాంబర |

                దేవదేవ ధవళాచల మందిర గంగాధరా హర నమో! నమో!

                దైవతలోక సుధాంబుధి హిమకర లోకశుభంకర నమో! నమో!

                నమో! నమో!, నమో! నమో!, నమో! నమో!, నమో! నమో!

                నమో! నమో!, నమో! నమో!, నమో! నమో!, నమో! నమో!

                నారాయణ హరి నమో! నమో!

                నారాయణ హరి నమో! నమో!

                నారాయణ హరి నమో! నమో!

                నారాయణ హరి నమో! నమో!

                నారద హృదయవిహారీ నమో! నమో!              | నారద |

                నారాయణ హరి నమో! నమో!                     | నారాయణ |

                నారాయణ హరి నమో! నమో!

                పంకజ నయనా పన్నగ శయనా .. ఆ.. ఆ

                పంకజ నయనా పన్నగ శయనా

                పంకజ నయనా పన్నగ శయనా

                శంకర వినుత నమో! నమో!                         | శంకరవినుతా |

                నారాయణ హరి నమో! నమో!

                నారాయణ హరి నారాయణ హరి

                నారాయణ హరి నమో! నమో!