ఎన్.టి.ఆర్. శ్రీ కృష్ణుని పాత్రకే కాకుండా ఎటువంటి పౌరాణిక పాత్రకైనా చక్కగా సరిపోతారంటే అతిశయోక్తి కాదు. భీష్ముని పాత్రలో ఎన్.టి.ఆర్. నటించిన చిత్రం "భీష్మ". ఇది 1962 లో విడుదల అయింది. కురుక్షేత్ర సంగ్రామంలో అజేయునిగ నిలిచిన కురు పితామహుడు భీష్మునిపై శ్రీ కృష్ణుడు కోపంతో చక్రం ప్రయోగించబోతాడు. అప్పుడు భీష్ముడు రథం దిగి వచ్చి శ్రీ కృష్ణుని స్తుతిస్తాడు. భాగవతం లోని "భీష్మస్తుతి" లోని పద్యాలను ఈ భీష్మ చిత్రంలో ఘంటసాల మాస్టారు అద్భుతంగా గానం చేసారు. "కుప్పించి ఎగసిన కుండలంబుల కాంతి" అనే పద్యం యొక్క దృశ్య, సాహిత్యాలను ఇక్కడ పొందుపరుస్తున్నాను. ఈ పద్యానికి మహా సహస్రావధాని శ్రీ గరికపాటి నరసింహారావు గారు యిచ్చిన వివరణ ఇక్కడ చూడండి.
ఇంటి ఇల్లాలు ఎలా ఉండాలో చక్కగా వివరించి చెప్పే అలనాటి మేటి పాట ఇది. భర్తను సంతోష పెడుతూ, "భోజ్యేషు మాతా" అని అన్నట్టు భోజనం తినిపించే విషయంలో తల్లిలా వ్యవహరించాలి. అత్త మామలకు సేవ చేయాలి. కుమారుని విద్యపై శ్రద్ధ వహించి వీరకుమారునిగా తీర్చిదిద్దాలి. ఈ భావాలను చక్కగా ప్రతిబింబించే విధంగా వ్రాసారు ఈ గీతాన్ని శ్రీ వీటూరి గారు. ఈ చిత్రానికి సంగీతం సమకూర్చిన వారు శ్రీ శ్రీపతి పండితారాధ్యుల కోదండపాణి (ఎస్.పి.కోదండపాణి) గారు. తెలుగు తెరకు ఎస్.పి.బాలసుబ్రహ్మణ్యం గారిని పరిచయం చేసినది వీరే. వీరు అతి చిన్న వయసులో (42 సంవత్సరాలు) పరమపదించారు.
1964 లో విడుదలైన పూజా ఫలం చిత్రంలో ఎ.ఎన్.ఆర్., జమున నాయికా నాయకులు. ఈ చిత్రంలో ఘంటసాల మాస్టారు ఒకే ఒక ఏకగళ గీతం పాడారు. అది శ్రీ సి.నారాయణ రెడ్డి గారి రచన అయిన "నిన్నలేని అందమేదో నిదుర లేచెనెందుకో". సుప్రభాత సమయంలో హీరో పూల తోటలో తిరుగుతూ ప్రకృతి అందాలకు మైమరచి, సూర్య కాంతికి స్ఫూరితితో విరిసిన పూల బాలలను చూస్తూ, పరవశంతో పాడిన పాట. ఈ పాట వినడానికి ఎంతో ఆహ్లాదంగా వుంటుంది. దీనిని శుద్ధ సావేరి రాగంలో చిరకాలం మనకు గుర్తుండే రీతిలో బాణీ కట్టారు స్వర కర్త అయిన సాలూరు రాజేశ్వర రావు గారు. ఈ పాట దృశ్య, సాహిత్యాలను ఇక్కడ పొందుపరుస్తున్నాను.
1972 లో బాపు దర్సకత్వం లో విడుదలైన సంపూర్ణ రామాయణం చిత్రంలో శోభన్ బాబు శ్రీరామునిగా, చంద్రకళ సీతగా, ఎస్.వి.రంగారావు రావణునిగా, అర్జా జనార్ధన రావు అంజనేయుడుగా నటించారు. ఆరోజుల్లో ఆంజనేయుని పాత్ర అంటే అది కేవలం అర్జా జనార్ధనరావు గారే వేసి నప్పించగలిగే వారు. ఈ చిత్రంలోని ఎక్కువ పద్యాలు శ్రీ గబ్బిట వెంకట రావు గారు వ్రాసారు. పద్యాలు ఘంటసాల మాస్టారు, మాధవపెద్ది సత్యం గార్లు పాడారు. మాధవపెద్ది గారు చిత్ర సీమలో మాస్టారి తరువాత పద్యాలు పాడటంలో చక్కని శైలి కనబరిచేవారు. ముఖ్యంగా ఎస్.వి.ఆర్.కు పద్యాలు, రేలంగి కి పాటలు ఎన్నో చిత్రాలలో పాడారు.
1962 లో వచ్చిన ఎన్.ఏ.టి.వారి గులేబకావళి కథ కు యాభై సంవత్సరాలు నిండాయి. దీనిలో ఎన్.టి.ఆర్., జమున నాయికా నాయకులుగా నటించారు. ఒక గులేబకావళి అనేది ఒక బకావలి అనే పుష్పం పేరు. ఇది శ్రీ మధిర సుబ్బన్న దీక్షితులు వ్రాసిన కాశీ మజిలీ కథలు నుండి తీసుకున్నదంటారు. నిజానికిది హిందీ/ఉర్దూ లో "గుల్ ఎ బకావలి". ఇందులో హీరో ముస్లిం వేషంలో కనిపిస్తాడు. అతనికి అనువుగా ఉర్దూ పదాలను తెలుగు చిత్ర సాహిత్యంలో తీసుకు రావడానికి తెలుగు, ఉర్దూ భాషలలో కవియైన శ్రీ సి. నారాయణ రెడ్డి గారిని బహుశా ఆహ్వానించి ఉండవచ్చు. సి.నా.రే. గారు వ్రాసిన పాటలలో ఘంటసాల, సుశీల గార్లు పాడిన "నన్ను దోచుకుందువటే వన్నెల దొరసాని" సూపర్ హిట్. ఈ చిత్రం యొక్క విశేషాలను NTV సమర్పించిన క్రింది మూడు భాగాలలో చూడగలరు.
మొదటి భాగం
రెండవ భాగం
ఆఖరి భాగం
అయితే ఈ గులేబకావళి కథకు అసలు కథ ఏమిటి? ఈ అంశాన్ని వనితా టీవీ వారు రెండు భాగాలలో సమర్పించారు. దీనిని చెబుతున్నవారు శ్రీ MBS ప్రసాద్ గారు. ముఖ్యంగా తెలుగు సినిమా కథ ఒక మూలమైన ఎం.జి.ఆర్. నటించిన అదే పేరుగల చిత్రంతో పోలిస్తే ఏయే తేడాలు వున్నాయి అన్నది తెలుస్తుంది.
ఘంటసాల మాస్టారి పాటలు, పద్యాలు, శ్లోకాల సాహిత్యాన్ని సేకరించి అభిమానులందరికి అందించాలనే చిన్న తాపత్రయం ఈ 'ఘంటసాల" బ్లాగు ఉద్దేశం. ఏవైనా పొరపాట్లు దొర్లి వుంటే ఆయా పోస్టుల దిగువన గాని, లేదా ఇ-లేఖ ద్వారా గాని తెలియజేయగలరు. నా ఇ-లేఖ చిరునామా: suryvulimiri@gmail.com
