కనులవిందుగా తీర్చిదిద్దిన "జయజయ జయశ్రీ వేంకటేశ" - ఘంటసాల భక్తి గీతం

కలియుగదైవమైన శ్రీ వేంకటేశ్వరుడు అర్చావతారమంటారు. లక్ష్మీవిష్ణువులను సనకసనందాదులు స్తుతిస్తున్న తరుణంలో భృగుమహర్షి వైకుంఠానికి రావడం, అతనిని నిర్లక్ష్యం చేసారన్న ఆగ్రహంతో ఆ ముని విష్ణువక్షస్థలాన్ని తన్నడం, అందుకు విష్ణువక్షస్థలవాసినియైన వైష్ణవి అలిగి భూలోకం వెళ్ళిపోవడం జరుగుతాయి. ఆమెను వెతుకుతూ వనజనాభుడు భూమిని చేరి ఒక వల్మీకంలో వసిస్తాడు. శ్రీహరికి శివుడు ధేనురూపియై పాలిస్తూండగా పశులకాపరి కొట్టినదెబ్బ శ్రీహరికి తగులగా అతడు ఆ కాపరిని పిశాచంగ అవ్వమని శపిస్తాడు. తరువాత శ్రీనివాసుడు వకుళమాత గా అవతరించిన యశోద ఇంటిని చేరుతాడు. తదుపరి ఆకాశరాజు తనయయైన పద్మావతిని గాంచి, మోహించిన శ్రీనివాసుడు కుబేరుడు చేసిన ధనసహాయంతో పద్మావతిని పరిణయమాడతాడు. ఆ దంపతులు తదుపరి అగస్త్యముని ఆశ్రమంలో ఆరు మాసములు అతిథులుగా వుంటారు. ఆకాశరాజు అనుజుడైన తొండమాన్‌ చక్రవర్తి ఆ దంపతుల కోసం శేషాచలంపై అందమైన 'ఆనందనిలయం' అనే భవంతి నిర్మిస్తాడు. ఇంతలో లక్ష్మీదేవి తనన పతిని వెతుక్కుంటూ వచ్చేసరికి  శ్రీనివాసుడు శిలారూపుడై శ్రీ వేంకటేశ్వరుడయాడు. స్వామివారు భక్తజనకోటికి పుణ్యఫలంగా వున్నాడు.

ఆ శ్రీనివాసుని చరితాన్ని చక్కని భక్తిగీతంగా మలచారు ఎ. వేణుగోపాల్.  ఏడు చరణాలున్న ఈ గీతానికి మొదటి నాలుగు చరణాలు సామ రాగంలోను తరువాతి మూడు చరణాలను మధ్యమావతిలోను ఈ రెంటిమధ్య వచ్చే "ఆనందమానందమాయెనే “ అన్న చిరపరిచితమైన జానపద బాణీని వివాహ సందర్భానికి ఆపాదిస్తూ సాంప్రదాయమైన ఆనందభైరవిలోను  స్వరపరచారు ఘంటసాల మాస్టారు. ఈ రసవత్తర గీతానికి హృద్యమైన దృశ్యఖండికలతో సహజ చిత్రదృశ్యమా అన్న నేర్పరితరంతో రూపుదిద్దారు బ్యాంక్ ఆఫ్ ఘంటసాల కు చెందిన హరీష్ గారు, వారికి ధన్యవాదాలు. ఇక ఆస్వాదించండి మాస్టారి అద్భుతమైన భక్తి గీతం "జయజయ జయశ్రీ వేంకటేశా".

Video Source: Bank of Ghantasala

ప.	జయజయ జయశ్రీ వేంకటేశా!				ఆనందమానందమాయెనె
	జయజయ జయ ఓం శ్రితజనపోషా!	|జయ|			పరమానందమానందమాయెనె
చ1.	సనకాది ఋషులు సన్నుతిసేయ			చ5.	కొండలపైనే తొండమానుడు
	లక్ష్మిదేవి నీ పాదములొత్త				ఆలయమొకటి కట్టించెనయ
	భృగు కోపమున వైకుంఠమిడి				స్వర్ణశిఖరపు శేషశైలమున
	భూలోకమునే జేరితివయ్యా				స్థిరనివాసివై వెలసితివయ్యా	|జయ|
చ2.	వల్మీకమున దాగియుండగా			చ6.	రమాదేవి నిను వదకుచు చేరగ
	రుద్రుడె గోవై పాలివ్వ				శిలారూపమున వెలసితివయ్యా
	గొల్లడొకడు నీ శిరమున బాదగ				భక్తకోటికిదె నిత్య దర్శనం
	ఘోర శాపమునె యిచ్చితివయ్యా	|జయ|			పాపవిమోచన పుణ్యఫలమయా	|జయ|
చ3.	కానలలోన ఒంటివాడవై			వచ.	నీ మహాత్మ్యపఠనమే మహాస్తోత్రమయా, నీ
	తిరుగుతు వకుళను జేరితివయ్య				దివ్యనామమే కైవల్యమయా, దీనుల మము
	వకుళమాతకు ముద్దుబిడ్డవై				కరుణించవయ, ఓ! వేంకటేశా!..ఆ..ఆ..
	మురిపెముతోనె పెరిగితివయ్య	|జయ|
				చ7.	నమో వేంకటేశా! నమశ్శ్రీనివాసా!
వచ.	అంతనొక దినంబున పూదోటలోన ఆకాశరాజు				నమో చిద్విలాసా! నమః పరమపురుషా!
	తనయ శ్రీ పద్మావతీదేవిని గాంచి, వలచి				నమో తిరుమలేశా! నమో కలియుగేశా!
	వలపించితివో మహానుభావా!..ఆ..ఆ..				నమో వేదవేద్యా! నమోవిశ్వరూపా!
					నమో లక్ష్మీనాథా! నమో జగన్నాథా!
చ4.	లోకనాథుని కల్యాణమునకు				నమస్తే, నమస్తే, నమః
	కుబేరపతిని యాచించి				ఏడుకొండలవాడా! వెంకటరమణా!
	ఆ కుబేరధనముతొ నీకల్యాణము				గోవిందా! గోవింద!
	మహోత్సవంబుగ జరిగిందయ్య	|జయ|

కృతజ్ఞతలు: ఈ పోస్టులోని ఉపోద్ఘాతంలోని కొన్ని విషయాలు శ్రీ పురుషోత్తమాచార్యుల వారి "మన ఘంటసాల సంగీత వైభవం" నుండి గ్రహించడమైనది. వారికి మనఃపూర్వక ధన్యవాదములు.