శ్రీరామునిపై చక్కని భక్తి గీతం 'జయజయ జానకిరామ' - భీమాంజనేయ యుద్ధం నుండి

1966 లో పతాకం పై కాంతారావు, రాజశ్రీ జంటగా నిర్మించబడిన పౌరాణిక చిత్రం భీమాంజనేయ యుద్ధం. ఈ చిత్రం లో  ఇద్దరు ప్రముఖ వెయిట్ లిఫ్టర్లు దండమూడి రాజగోపాలరావు భీమునిగా, కామినేని ఈశ్వరరావు ఆంజనేయునిగా నటించారు.  దండమూడి ఇదే పాత్రను నర్తనశాల, వీరాభిమన్యు, చిత్రాలలో చేశారు. ఈ చిత్రానికి జయజయ జానకి రామా అనే పాటను రచించినది "రాజశ్రీ" పేరున అనువాద చిత్రాలకు సంభాషణలు, పాటలు పకడ్బందీగా వ్రాయగలిగిన దిట్ట, విజయనగరలో పుట్టిన ఇందుకూరి రామకృష్ణం రాజు. ఈ పాటను గానం చేసినది ఘంటసాల, ఉడతా సరోజిని. సంగీతం టి.వి.రాజు (తోటకూర వెంకటరాజు) సమకూర్చారు.

వీడియో, పోస్టరు పొందుపరచిన శ్రీ బొల్లాప్రగడ సోమేశ్వరరావు గారికి కృతజ్ఞతలు.

పల్లవి:	ఘంటసాల:	జయజయ జానకి రామ
	ఇద్దరు:	జయజయ జానకి రామ
	ఘంటసాల:	రఘుకుల సోమా, పావన నామా
	ఇద్దరు:	రఘుకుల సోమా, పావన నామా
		జయజయ జానకి రామ, రామా
		జయజయ జానకి రామ
చరణం:	ఘంటసాల:	ఖలులను ద్రుంచి సుజనుల కావగ
		ధరణిని వెలసిన దశరథ రామా!
	ఇద్దరు:	ఖలులను ద్రుంచి సుజనుల కావగ
		ధరణిని వెలసిన దశరథ రామా!
	ఘంటసాల:	శివుని ధనస్సును భంగము చేసి
	ఇద్దరు:	శివుని ధనస్సును భంగము చేసి
	ఘంటసాల:	సీతను గైకొన్న కల్యాణ రామా!
	ఇద్దరు:	జయజయ జానకి రామ, రామా
		జయజయ జానకి రామ
చరణం:	ఘంటసాల:	అల విభీషణుడు అభయము కోరా
		ఆదరించి కరుణించిన రామా!
	ఇద్దరు:	అల విభీషణుడు అభయము కోరా
		ఆదరించి కరుణించిన రామా!
	ఘంటసాల:	దశకంధరుని రణమున దునిమి
	ఇద్దరు:	దశకంధరుని రణమున దునిమి
	ఘంటసాల:	లోకశాంతి నెలకొల్పిన రామా!
	ఇద్దరు:	జయజయ జానకి రామ, రామా
		జయజయ జానకి రామ
	ఘంటసాల:	తారకరామా! దనుజ విరామా, మేఘశ్యామా! శ్రీరామా!
	సరోజిని:	తారకరామా! దనుజ విరామా, మేఘశ్యామా! శ్రీరామా!
	ఇద్దరు:	భూమి సుతామా, సద్గుణధామా, పాహి పాహి పట్టాభిరామా!
		జయజయ జానకి రామ, రామా
		జయజయ జానకి రామ
		రఘుకుల సోమా, పావన నామా
		జయజయ జానకి రామ
		జయజయ రాం, జానకి రాం
		జయజయ రాం, జానకి రాం