వెడలిపో వెడలిపో తెల్లదొరా - ఘంటసాల, బృందం 'మన దేశం' (1949) నుంచి

క్విట్ ఇండియా ఉద్యమం భారత స్వాతంత్ర్య సంగ్రామంలో ఒక మరపురాని ఘట్టం.  ఇది 1942 ఆగస్టులో జరిగింది. తెల్ల దొరల పాలన ఎప్పుడంతమొందుతుందా అని యావద్భారత దేశం ఎదురుచూస్తోంది ఆ రోజుల్లో. దేశమంతా ఒకటే నినాదం. జాతి యావత్తూ ఒకటే సందేశం. "కొల్లగొట్టినది చాలు, తెల్లదొరా వెనుకకు వెళ్ళిపో" అని. ఎందరో నిస్వార్ధ నాయకులు తరతమ భేదాలు మరచి, తమ త్యాగాలతో దేశమంతటిని ఒకే త్రాటిపై నడిపించారు. మనకు స్వరాజ్యం వచ్చింది. అయితే రాజ్యాంగ నిర్మాణం, లేఖనం జరిగి జనవరి 26, 1950 కి భారత దేశం సర్వసత్తాక, సామ్యవాద, లౌకిక, ప్రజాస్వామ్య గణతంత్ర రాజ్యంగా ఆవిర్భవించింది. అదే మనం ప్రతి యేటా జరుపుకునే గణతంత్ర దినోత్సవం (Republic Day). అయితే స్వాతంత్ర సమరం నేపధ్యంగా చలన చిత్రం తీయడం ఆరోజుల్లో పెద్ద సాహసమే. 1949 లో మీర్జాపురం రాజా గారి సతీమణి, శ్రీమతి సి.కృష్ణవేణి తన కుమార్తె అయిన మేకా రాజ్యలక్ష్మి అనురాధ పేరుమీద స్థాపించిన ఎం.ఆర్.ఎ. పతాకం పై స్వరాజ్య సమర నేపధ్యంతొ, దేశభక్తి ప్రధానాంశంగా నిర్మించిన  సాంఘిక చిత్రం మనదేశం.  ఈ చిత్రంలో స్వాతంత్ర్య సమరయోధులు చేసిన పాదయాత్రను చూపిస్తూ, చిత్రీకరించిన సన్నివేశానికి సముద్రాల సీనియర్ వ్రాసిన దేశభక్తి గీతం "వెడలిపో వెడలిపో తెల్లదొరా", ఘంటసాల, బృందం పాడారు. ఇది ఘంటసాల పూర్తి సంగీత దర్శకత్వ బాధ్యతలు వహించిన తొలి చిత్రం. అంతే కాదు నటుడు గా నందమూరి తారక రామారావుకు, గాయని గా పి.లీల కు  ఇది పరిచయ చిత్రం కూడ. ఈ చిత్రానికి దర్శకులు ఎల్.వి.ప్రసాద్  (అక్కినేని లక్ష్మీ వర ప్రసాద్).

ఈ పాట ముందు వినిపించే కంఠం అలనాటి ప్రముఖ నటుడు సి.హెచ్.నారాయణ రావుది.

  "పరాధీనతానమ్రమైన మాతృ దేశాన్ని ఉద్ధరించే సమరంలో యువకులకు పిరికి మందు నూరిపోసి వెనకడుగు వేయించే తల్లి తల్లి కాదు. పెద్దలు పెద్దలు కారు. ప్రేమించే హృదయంలో ప్రేమ లేదు."

అందరికీ గణతంత్ర దినోత్సవ శుభాకాంక్షలు

	పల్లవి:	పురుషులు:	వెడలిపో
		స్త్రీలు:	వెడలిపో
		అందరు:	వెడలిపో
		పురుషులు:	వెడలిపో
		స్త్రీలు:	వెడలిపో
		అందరు:	వెడలిపో
		పురుషులు:	తెల్లదొరా మాదేశపు ఎల్లదాటి వెడలిపో
		స్త్రీలు:	తెల్లదొరా మాదేశపు ఎల్లదాటి వెడలిపో
		స్త్రీలు:	వెడలిపో
		పురుషులు:	వెడలిపో
	చరణం:	పురుషులు:	కల్లతెలిసినారు ప్రజలు చెల్లదింక నీ ఆటా
		అందరు:	కల్లతెలిసినారు ప్రజలు చెల్లదింక నీ ఆటా, వెడలిపో
		పురుషులు:	తెల్లదొరా
		స్త్రీలు:	వెడలిపో
		పురుషులు:	వెడలిపో
	చరణం:	స్త్రీలు:	కల్లబొల్లి కబురులాడి కాని పగలు కల్పించి
		అందరు:	కల్లబొల్లి కబురులాడి కాని పగలు కల్పించి
		పురుషులు:	కొల్లగొట్టి మా దేశము గుల్లచేసి తిన్నారిక
		అందరు:	కొల్లగొట్టి మా దేశము గుల్లచేసి తిన్నారిక, వెడలిపో
		పురుషులు:	తెల్లదొరా
		స్త్రీలు:	వెడలిపో
		పురుషులు:	వెడలిపో
	చరణం:	పురుషులు:	ప్రజలె ప్రజల మేలుగోరి పాలించే యుగమ్మిది
		అందరు:	ప్రజలె ప్రజల మేలుగోరి పాలించే యుగమ్మిది
		పురుషులు:	చోటు లేదు మీకిట కడసారి మాటయిదే
		అందరు:	చోటు లేదు మీకిట కడసారి మాటయిదే
		పురుషులు:	మూటగట్టి వెడలిపో వెడలిపో
		అందరు:	వెడలిపో

మనదేశం చిత్రంలో ఎన్‌.టి.ఆర్., సి.కృష్ణవేణి

Thanks: to 'manadesamtdp' for posting the video clip and to 'Wikipedia' for providing background information. Audio file and Movie Poster are from Sakhiyaa.com