ఋణానుబంధ రూపేణ - ఋణానుబంధం నుండి ఘంటసాల

కర్మ సిద్ధాంతం ప్రకారం మనం ఎవరికైనా బాకీ ఉంటె ఆ బాకీ ఈ జన్మలో తీర్చ లేక పొతే, రాబోయే జన్మలో ఋణపడి వున్న వారి కడుపున పుట్టి లేదా వారింట చేరి ఆ ఋణం తీర్చుకుంటామని మనవాళ్ళ నమ్మకం.  అందువలన ఆ ఋణం వేరొకరి యింట పిల్లలుగా పుట్టి, లేదా పశువులుగానో,  పెంపుడు  జంతువులు గానో పుట్టి తల్లిదండ్రులకు లేదా యజమానికి సేవ చేసి తీర్చుకుంటాము. అందుకే అన్నారు "రుణానుబంధ రూపేణ పశుపత్నీ సుతాలయా!" అని. ఈ ఇతివృత్తంతో తీసిన అంజలీ పిక్చర్సు చిత్రం రుణానుబంధం. అనుకోని పరిస్థితులలో అగ్నిప్రమాదానికి బలైన ఒక జమీందారు ఏకైక కుమారుడ్ని, తనకు ఏ సంబంధము లేకపోయినా, పెంచి పెద్ద చేసి డాక్టరును చేయాలన్న సత్సంకల్పంతో ఒక స్త్రీ (అంజలీదేవి) పల్లె వదలి పట్నానికి వెళ్ళి బాధ్యత నిర్వహించే సన్నివేశాలతో అంజలీ పిక్చర్సు పతాకం పై రూపొందించిన ఈ చిత్రానికి ఆదినారాయణ రావు సంగీతం సమకూర్చారు. అక్కినేని, గిరిజ, రేలంగి, గుమ్మడి తతిమ్మా తారాగణం.  ఈ చిత్రానికి ఘంటసాల మాస్టారు నాలుగు పాటలు పాడారు. ముఖ్యంగా టైటిల్ సాంగ్ "ఏనాటిదొ ఈ బంధం" అన్న పాట కలకాలం సున్నిత మనస్కుల గుండెలను కలచి కదిలించే  సముద్రాల జూనియర్ సందేశాత్మక గీతం.  ఇదే పాట చిత్రం మధ్యలో వేరొక సాకీతో అదే బాణీతో సాగుతుంది.  మొదటి పాట ఒక సాధువు పాడతాడు, రెండవ పాట నేపధ్యంలో వినిపిస్తుంది. ఆ రెండు పాటల దృశ్య, శ్రవణ, సాహిత్యాలను ఇక్కడ పొందుపరుస్తున్నాను.

Thanks to Mango music for up loading the video to You Tube

Thanks to Mango music for up loading the video to You Tube

	చిత్రం:	ఋణానుబంధం (1960)
	రచన:	సముద్రాల జూనియర్
	సంగీతం:	ఆదినారాయణ రావు
	గానం:	ఘంటసాల
	సాకీ:	ఋణానుబంధ రూపేణ పశుపత్నీ సుతాలయా
	పల్లవి:	ఏనాటిదొ ఈ బంధం ఈ జీవుల సంబంధం
		తెలియగరాని ఈ అనుబంధం
		ఋణానుబంధం అంతా ఋణానుబంధం	| ఏనాటిదొ |
	చరణం:	ఆహా..ఆ.. కడుపున కన్న తల్లొకరు
		కనని తల్లియై పెంచేదొకరు	| కడుపున |
		పుట్టేదీ ఒక చోటా.. పెరుగుట వేరొక చోట
		హు.. ఎవరికి ఎవరో.. ఏమౌతారో
		ఋణానుబంధం అంతా ఋణానుబంధం
	చరణం:	ఆహా..జీవితమే చదరంగం
		జీవుల పావుల రణరంగం	| జీవితమే |
		దేవునకది తెరలాటా.. తెలియదు మనకే బాట
		హు.. ఎవరికి ఎవరో.. ఏమౌతారో
		ఋణానుబంధం అంతా ఋణానుబంధం	| ఏనాటిదొ |
		* * * *
	సాకీ:	ఆపదలన్నీ సహించాలీ
		అన్నమాట సాధించాలీ	| అన్నమాట |
	పల్లవి:	మాటే జీవిత లక్ష్యం, మాటే మానవ ధర్మం
		మాటకు నిలచి మనగలవారి చరిత సార్ధకం
		వారి బ్రతుకె సార్ధకం	| మాటే జీవిత |
	చరణం:	ఓహో..ఓ.. కడుపున కన్న తల్లొకరు
		కనని తల్లియై పెంచేదొకరు	| ఓహో.. కడుపున |
		పుట్టేదీ ఒక చోటా.. పెరుగుట వేరొక చోట
		ఎవరికి ఎవరో.. ఏమౌతారో
		ఋణానుబంధం అంతా ఋణానుబంధం
		మాటే జీవిత లక్ష్యం, మాటే మానవ ధర్మం
		మాటకు నిలచి మనగలవారి చరిత సార్ధకం
		వారి బ్రతుకె సార్ధకం	| మాటే జీవిత |
		వారి బ్రతుకె సార్ధకం