మనదేశం నుండి మాస్టారి గొంతులో పురాణ శ్లోకాలు

1949 లో విడుదల అయిన మనదేశం చిత్రం నటుడిగా నందమూరి తారక రామారావు గారిని తెలుగువారికిచ్చి, ఆ కళామతల్లికి ముద్దు బిడ్డగా పెంచి, తదుపరి చిరస్మరణీయమైన పౌరాణిక, సాంఘిక పాత్రలలో జీవింపజేసి విశ్వ విఖ్యాత నట సార్వభౌమునిగా తీర్చి దిద్దింది. భారత స్వరాజ్య సంగ్రామము నేపధ్యంగా "విప్రదాస్" అనే బెంగాలి నవల ఆధారంగా నిర్మించబడిన సాంఘిక చిత్రమిది. ఇందులో రామారావు గారు పోలీస్ ఇన్స్పెక్టర్ గా నటించారు.  అయితే రాజకీయ ఇతివృత్తం నేపధ్యంలో చిత్రంగా మొదలయిన 'మనదేశం' తెలుగువారి ఆత్మగౌరవమనే వేదికపై సింహనాదంగా మారి  'తెలుగుదేశం' ఏర్పడటానికి దారి తీస్తుందని "అన్నగారు" ఆనాడు అనుకొని ఉండకపోవచ్చును. మనదేశం చిత్రం కోసం రెండు శ్లోకాలు, ఒక బుర్రకథ, కొన్ని పాటలు మాస్టారు గానం చేసారు.  శ్లోకాలు ఇక్కడ పొందు పరుస్తున్నాను. 

సంగీతం: ఘంటసాల

ఆడియో మూలం: ఘంటసాల గాన చరిత

జననీ జన్మ భూమిశ్చ స్వర్గాదపి గరీయసీ

రామ్ రామ్ రామ్

ఈ శ్లోకానికి మూలం రామాయణమని, రావణ వధానంతరం లక్షణునితో శ్రీరాముడు ఈ శ్లోకాన్ని పేర్కొన్నాడని కొందరి అభిప్రాయం. ఈ పంక్తికి మరొక విశిష్టత వుంది. 'జననీ జన్మ భూమిశ్చ స్వర్గాదపి గరీయసీ" అనేది నేపాల్ దేశపు 'ఆదర్శవాక్యం" (motto). భారతదేశానికి "సత్యమేవ జయతే" అని అనుకుంటాను. అయితే రామాయణ కథనం ప్రకారం ఈ పంక్తికి ముందు ఇంకొక పంక్తి వున్నది. అదేమిటంటే..

అపి స్వర్ణమయీ లంకా న మే లక్ష్మణ రోచతే

జననీ జన్మ భూమిశ్చ స్వర్గాదపి గరీయసీ

తాత్పర్యం: "ఓ! లక్ష్మణా! ఈ స్వర్ణమయమయిన లంక నన్ను ఏవిధంగా ఆకట్టుకోలేదు. కన్నతల్లి, పుట్టిన ప్రదేశము స్వర్గం కన్న మిన్న సుమా!"

      మనదేశం చిత్రం కోసం ఘంటసాల మాస్టారు గానం చేసిన ఇంకొక శ్లోకం పంచమ వేదం మహాభారతం లోని పవిత్ర భగవద్గీత నుండి గ్రహించబడింది. భగవద్గీత లో మొదటి అధ్యాయమైన "అర్జున విషాద యోగం" లో 33 వ శ్లోకమ్ లో అర్జునుడు శ్రీకృష్ణునితో ఇలా అంటాడు:

యేషామర్థే కాంక్షితమ్ నో రాజ్యం భోగాః సుఖాని చ  
త ఇమే(అ)వస్థిత యుద్ధే ప్రాణాంస్త్యక్త్వా  ధనాని చ

తాత్పర్యం: "మనం ఎవరి గురింఛి రాజ్యాన్ని, భోగ భాగ్యాలను, అన్ని సుఖాలను కోరుతున్నామో, వారంతా తమ  ధనాన్ని, ప్రాణాలను సైతం వదలుకునేందుకు సిద్ధపడి ఈ యుద్ధ భూమిలో నిలిచి యున్నారు".

గమనిక: శ్లోకం తరువాత వచ్చే వ్యాఖ్యానంలో వినపడిన ఇద్దరి గొంతుకలలో రెండవది మాస్టారిది.

చిత్ర సీమలో ఘంటసాల గారు పాడిన మొదటి భక్తి గీతం

కన్నాంబ, గోవిందరాజుల సుబ్బారావు

1947 లో విడుదల అయిన పలనాటి యుద్ధం చిత్రం లో ఘంటసాల మాస్టారు నాలుగు పాటలు పాడారు. అలనాటి ప్రముఖ నటి, గాయని అయిన శ్రీమతి పసుపులేటి కన్నాంబ నాయకురాలు నాగమ్మ గాను, శ్రీ గోవిందరాజుల సుబ్బారావు బ్రహ్మనాయుడు గాను, శ్రీ ఎ.ఎన్.ఆర్. బాలచంద్రుడు గాను ఈ చిత్రంలో నటించారు. ఈ చిత్రానికి కొన్ని ప్రత్యేకతలు వున్నాయి. అవి ఏమిటంటే, సంగీత దర్శకులైన శ్రీ గాలి  పెంచల నరసింహారావు గారికి మన ఘంటసాల మాస్టారు సహాయ సంగీత దర్శకునిగా పనిచేసారు. అక్కినేని గారు స్వయంగా పాడారు, మాష్టారితో కలిసి పాడారు.  ఘంటసాల గారు చలన చిత్ర రంగంలో పాడిన మొట్ట మొదటి భక్తి గీతం "తెర తీయగా రాదా" కన్నాంబతో పాడిన యుగళ గీతం. దాయాదుల మధ్య రేగిన మతద్వేషాల వలన ఎంతో జననష్టం జరిగి, ఇంచుమించు ఇరుపక్షాల లో అంతా పల్నాటియుద్ధం లో మరణించాక, రక్త సిక్తమయిన చేతులు జోడించి చెన్నకేశవ స్వామి ఎదురుగా నిలిచి పశ్చాత్తాపంతో బ్రహ్మనాయుడు, నాగమ్మ పాడతారు ఈ పాట. మాస్టారు ఏ పాట పాడినా, ఎవరితో పాడినా వారి ఉచ్చారణ స్వచ్చంగా, తేట తెల్లంగా వుంటుంది. ఈ పాట వింటే మీకే తెలుస్తుంది. ఈ పాట ఆడియో, సాహిత్యం ఇక్కడ పొందుపరుస్తున్నాను. సాహిత్యంలో ఎక్కడయినా తప్పులు దొర్లివుండవచ్చును. మీకు తెలిస్తే తప్పక నాకు తెలుపగలరు. సరిదిద్దుకుంటాను. 

ఘంటసాల    కన్నాంబ 

చిత్రం:         పల్నాటి యుద్ధం (1947)

రచన:         సముద్రాల రాఘవాచార్యులు

సన్గీతం:       గాలి పెంచల నరసింహారావు

గానం:         ఘంటసాల, పి.కన్నాంబ

                    ఘం:   తెర తీయగా రాదా! దేవా!

                                    తెర తీయగ రాదా! దేవా!

                                    తెర తీయగ రా.దా! దేవా!

                                    తెర తీయగ రా..దా.. 

                    క:             తన వారూ, పెరవారలని            | తనవారూ |

                                    తరతమ భావములు మాని        | తరతమ |

                    ఘం:       జగదానందమె పరమార్ధముగా     | జగదానందమె |

                                    నరులు బ్రదుక రాదా..కాదా.        | నరులు బ్రదుక |

                                    తెర తీయగ రాదా

                    ఇద్దరు:    సత్యము, శివము, సుందరమౌ

                                    సాత్విక రూపము నిత్యము కాదా

                                    మాలో యిక అనురాగము, సమత    | మాలో యిక |

                                    శాంతి శాశ్వతము కావా

                                    శాంతి, శాశ్వతము.. కాదా..

రాలీ, నార్త్ కరోలినాలో ఘంటసాల మరియు బాలు గాన కచేరీ

అమెరికాలోని నార్త్ కరోలినా రాష్ట్రం లోని రాలీ (Raleigh, NC) పట్టణంలో నవంబరు 2011 లో హైదరాబాదు కు చెందిన వేగేశ్న ఫౌండేషన్ వారు వికలాంగుల సహాయార్ధం స్థానిక ట్రయాంగిల్ ఏరియా తెలుగు అసోసియేషన్ (TATA) అధ్వర్యంలో నాలుగవ ఘంటసాల ఆరాధనోత్సవం మరియు ప్రధమ బాలు సంగీతోత్సవం నిర్వహించారు. వేగేశ్న సంస్థకు చెందిన శ్రీ వంశీ రామరాజు గారు మాట్లాడుతూ తమ ప్రయత్నం "వికలాంగులను సకలాంగులుగా" చేయడమని, ఆ యజ్ఞంలో భాగంగా ఘంటసాల గారి పాటలతో విరాళాలను సేకరించుతున్నామని చెప్పారు.  

ఈ కార్యక్రమంలో ప్రముఖ గాయనీ గాయకులు హ్యుస్టన్, టెక్సాస్ కు చెందిన శ్రీమతి మణిశాస్త్రి గారు, హైదరాబాదుకు చెందిన శ్రీమతి గానాంజలి గారు, శ్రీ తాతా బాలకామేశ్వరరావు గారు, శ్రీ వినోద్‍బాబు గారు, స్థానిక గాయకులు సూర్యనారాయణ వులిమిరి, పలు ప్రసిద్ధమైన ఘంటసాల మరియు ఎస్.పి.బాలసుబ్రమణ్యం గార్ల పాటలను కెరియోకీలతో అద్భుతంగా గానం చేసి శ్రోతలను ఆనందింపజేసారు. వారు పాడిన పాటలలో ఈ వీడియోలో కొన్ని మాత్రం చూపించడం జరిగింది. అవి: 

వాతాపి గణపతింభజే	(వినాయకచవితి)	- బాలకామేశ్వరరావు;
దేవదేవ ధవళాచల	(భూకైలాస్)	- బాలకామేశ్వరరావు;
భలే మంచిరోజు	(జరిగిన కథ)	- వినోద్ బాబు;
సఖియా వివరించవే	(నర్తనశాల)	- మణిశాస్త్రి;
పార్వతి స్తోత్రం	(ప్రైవేట్ సాంగ్)	- గానాంజలి;
ఆడవే మయూరి	(చెల్లెలికాపురం)	- వినోద్ బాబు;
శివశంకరీ	(జగదేకవీరునికథ)	- బాలకామేశ్వరరావు, వినోద్ బాబు;
కురిసేను విరిజల్లులె	(ఘర్షణ)	- గానాంజలి, వినోద్ బాబు;
తెలిసిందిలే తెలిసిందిలే	(రాముడు-భీముడు)	- బాలకామేశ్వరరావు, మణిశాస్త్రి;
పల్లెకు పోదాం	(దేవదాసు)	- వినోద్ బాబు;
జయజయమహాదేవ శంభో	(కాళహస్తి మహత్మ్యం)	- సూర్యనారాయణ వులిమిరి;
నీలీల పాడెద దేవా	(మురిపించే మువ్వలు)	- మణిశాస్త్రి;
నగుమోము గనలేని	(త్యాగరాజకీర్తన)	- గానాంజలి;
శిలలపే శిల్పాలు	(మంచిమనసులు)	- బాలకామేశ్వరరావు;
ఝుమ్మంది నాదం	(సిరిసిరిమువ్వ)	- వినోద్ బాబు, మణిశాస్త్రి;
పుష్పవిలాపం	(ప్రైవేట్ సాంగ్)	- బాలకామేశ్వరరావు;
సాథీయా తూనే క్యాకియా	(హిందీ)	- వినోద్ బాబు, గానాంజలి;
మది శారదాదేవి మందిరమే	(జయభేరి)	- బాలకామేశ్వరరావు.

తెలుగు అసోసియేషన్ ప్రెసిడెంట్ శ్రీ కుమార్ నెప్పల్లిగారు వందన సమర్పణ చేసారు. టాటా కు చెందిన కమిటీ సభ్యులు శ్రీ నండూరి సాంబశివరావు గారు కార్యక్రమం నిర్వహించడంలో, వీడియో తీయడంలో సహకరించారు.  సూర్యనారాయణ వులిమిరి గాయకులకు, వేగేశ్న నిర్వాహకులకు తమ యింట ఆతిధ్యమిచ్చారు. వీడియో ఆఖరున కనిపించే గ్రూప్ ఫోటోలో ఉన్నవారు, ఎడమ నుండి కుడికి -కుమార్ నెప్పల్లి, సూర్యనారాయణ వులిమిరి, తాతా బాలకామేశ్వర రావు, వినోద్ బాబు, నండూరి సాంబశివరావు, వంశీ రామరాజు, గానాంజలి, మరియు మణిశాస్త్రి. ఈ కార్యక్రమము యొక్క కవరేజి టీవీ 9 లో ప్రసారమయింది. ఆ వీడియోను దిగువన పొందుపరుస్తున్నాను. ఈ కార్యక్రమంలో వికలాంగుల సంక్షేమం కోసం స్థానిక దాతలు సుమారు పదివేల డాలర్ల విరాళాలు ఇచ్చారు. మాస్టారి పాట ఎంతమందికో జీవనోపాధి చూపిస్తోంది కదా!

బలే మంచిరోజు మాస్టారి పుట్టినరోజు - కొన్ని మాస్టారి ప్రముఖ వెబ్ సైట్లు

ఘంటసాల మాస్టారికి జన్మదిన శుభాకాంక్షలు!  

ఈ రోజు అమర గాయకుడు శ్రీ ఘంటసాల గారి 89వ పుట్టినరోజు. ఆ మహానుభావుని గురించి ఎంతయినా వ్రాయవచ్చును. ఆయన కారణజన్ముడు. తెలుగువారికి శ్రీ ఘంటసాల ఒక అమూల్యమైన వరం. ఆయన పేరిట ఎందరికో సంగీతంలో అవార్డులు ఇవ్వడం జరిగింది. ఆయన పాట ఎంతోమంది అభాగ్యులైన పిల్లలకు జీవనోపాధిని, క్రొత్త జీవితాన్ని ఇచ్చింది. ఒక పాట అన్నా, పద్యం అన్నా ఇలా పాడాలన్న ప్రామాణికాన్ని నెలకొల్పింది ఆయన మంగళ గళం. మాస్టారు పాడిన పాటలలో ఏ పండగకైనా, కార్యక్రమానికైనా హాయిగా పాడుకునే పాట "జరిగిన కథ" చిత్రానికి శ్రీ సినారె వ్రాసిన "బలే మంచిరోజు పసందైన రోజు" అని ఒకసారి జనరంజని రేడియో కార్యక్రమంలో మాస్టారు అన్నారు. వారి పుట్టిన రోజున పసందైన ఈ పాటను, మాస్టారి మాటలను క్రింది ఆడియో ఫైలు లో వినండి. ఆడియో మూలం "ఘంటసాల గాన చరిత".

 

ఈ సందర్భంగా మాస్టారి గురించి తెలిపే, తెలుసుకోగలిగే కొద్ది సమాచారాన్ని నాకు అవగతమైన మేరలో తోటి ఘంటసాల అభిమానులకు ఉపయోగపడుతుందన్న ఉద్దేశంతో ఇక్కడ పొందుపరుస్తున్నాను.

   

మన ఘంటసాల - ఘంటసాల ప్రాజక్టు: ఈ సైటులో ఘంటసాల మాస్టారికి సంబంధించిన అన్ని వివరాలు దొరుకుతాయి. ముఖ్యంగా మాస్టారికి పలువురు సమర్పించిన నివాళులు, ఛాయా చిత్రాలు, వ్యాఖ్యానాలు, మాస్టారి కచేరీలు (న్యూయార్క్, చికాగో, మరియు కలకత్తా), పద్యాలు, పాటలు, భగవద్గీత, ఫన్ గేమ్స్, పాటల డేటాబేస్, గీతాల సాహిత్యము (లిరిక్స్) లభ్యమవుతాయి. ఈ సైట్ ను అభివృద్ధి పరచడంలో పలువురు ఘంటసాల అభిమానులు చేయూతనిస్తున్నారు. మాస్టారు పాడిన మొదటి పాట నుండి 60 ల వరకు మాస్టారు పాడిన, సంగీత దర్శకత్వం వహించిన చిత్రాలలోని పాటలు, పద్యాలు, కాలక్రమంలో అమర్చబడి వున్నాయి. ఈ పాటలన్నిటినీ వినొచ్చు లేదా భద్రపరచుకొన (download) వచ్చును. ఆయా లింకుల కోసం కావలసిన పదం మీద క్లిక్ చేయండి.

ఘంటసాల యాహూ గ్రూప్: ఇది ఇ-లేఖ (e-mail) గ్రూప్. ఇందులో మాస్టారికి సంబంధించిన పాటల, చిత్రాల తదితర విషయాలకు సంబంధించిన వివరాలు ఎప్పటికప్పుడు తెలుసుకొనవచ్చును, లేదా పాల్గొనవచ్చును. అంతేకాక ఘంటసాల గారి పాటల లిరిక్స్, ఆడియో ఫైల్సు, యూ ట్యూబ్ వీడియో లింకులు మాస్టారి అభిమానులచే పోస్టు చేయబడతాయి.  ఈ ఇ-గ్రూప్ లో చేరడానికి ఇక్కడ క్లిక్ చేయండి.

ఘంటసాల గళామృతం - పాటల పాలవెల్లి:  పలువురు ఘంటసాల మాస్టారి అభిమానులు కలసి వారి పాటల, చిత్రాల వివరాలను సేకరించి, సమకూర్చిన వెబ్ సైట్ ఇది. ఇందులో అక్షరక్రమంలో ఘంటసాల గారు పాడిన, సంగీత దర్శకత్వం నిర్వహించిన చిత్రాలలోని పాటల, పద్యాల వివరాలు పొందుపరచబడి వున్నాయి. దీనిని నిర్వహిస్తున్నది శ్రీ కొల్లూరి భాస్కర రావు గారు. వీరు హైదరాబాదు ఘంటసాల సంగీత కళాశాల సంచాలకులు. 
సఖియా: ఈ వెబ్ సైటు పైన పేర్కొన్న "ఘంటసాల గళామృతము-పాటల పాలవెల్లి" కి అనుబంధమైనది. ఇందులో 1930 ల నుండి 1960 ల వరకు వచ్చిన చాల తెలుగు చిత్రాల వివరాలన్నీ దొరుకుతాయి. ప్రతి చిత్రానికి సంబంధించిన సాంకేతిక వర్గం, పాటల విషయ సూచిక, మరియు ఆడియో ఫైల్సు పొందుపరచబడి వున్నాయి. 

Old Telugu Songs: ఈ సైటులో తెలుగు చిత్ర పరిశ్రమ ఆరంభం నుండి సుమారు 1960s వరకు విడుదలయిన చిత్రాల పాటలు free గా download చేసుకోవచ్చును. అంతేకాక కావలసిన సినిమా, గాయని లేదా గాయకుడు, సంగీత దర్శకుడు/దర్శకురాలు, లేదా గీత రచయితను, లేదా వారి కాంబినేషను గాని ఎన్నుకొని పాటలను వెదుక్కోవచ్చు.
 

చిమట-మ్యూజిక్: ఈ వెబ్ సైట్ లో ఘంటసాల గారితో మొదలుకొని అందరు తెలుగు చలన చిత్ర రంగం లోని గాయనీ గాయకుల పాటల ఆడియోలు, కొన్ని వీడియో మరియు లిరిక్స్ యొక్క లింకులు దొరుకుతాయి.

వేగేశ్న ఫౌండేషన్:  వికలాంగులను సకలాంగులుగా చేసే ఉన్నతమైన ఆశయంతో హైదరాబాదులోని హయత్ నగర్ లో వేగేశ్న ఫౌండేషన్ స్థాపించబడింది.  ఈ సంస్థను నిర్వహిస్తున్న శ్రీ వంశీ రామరాజు గారు ప్రతి సంవత్సరం శ్రీ ఘంటసాల గారి ఆరాధనోత్సవాలు జరుపుతుంటారు. స్వదేశంలోను, ప్రవాసంలోను నివాసం చేస్తున్న ప్రఖ్యాత గాయనీ, గాయకులతో మాస్టారి పాటల కచేరీలను పలు నగరాలలో ఏర్పాటు చేసి వికలాంగులైన పిల్లల అభివృద్ధికి విరాళాలు సేకరిస్తుంది ఈ సంస్థ. ఒకానొక కార్యక్రమంలో రామరాజు గారు మాట్లాడుతూ "ఘంటసాల మాస్టారి పాటలు ఈ పిల్లలకు భవిష్యత్తును యిచ్చాయి". వీరంతా మాస్టారికి ఎంతో ఋణపడి వున్నారు" అని అన్నారు. ఆ విధంగా మాస్టారు భౌతికంగా మన మధ్య లేనప్పటికీ, వారు మన మనసులలో చిరస్థాయిగా నిలిచి వున్నారు, వారి పాటలు ఎందఱో అభాగ్యుల చీకటి హృదయాలలో వెలుగును నింపుతున్నాయి. 

ఘంటసాల పాటల సాహిత్యం దొరికే కొన్ని వెబ్ సైట్లు:  

*పాడుతా తీయగా చల్లగా * తెలుగు పాటలు * గీత లహరి * Lyrics in Telugu *  తెలుగు సుమధుర గీతాలు * ఆణిముత్యాలు * Old Telugu Songs *  

ఘంటసాల: ఇది నా బ్లాగు. ఇందులో ఘంటసాల మాస్టారు పాడిన పద్యాల, పాటల సాహిత్యాన్ని పొందు పరచే ప్రయత్నం చేస్తున్నాను. సాహిత్యంలో ఏవైనా తప్పులు దొర్లి ఉంటే సహృదయంతో క్షమించి, సవరణలు సూచించ గలరు. 
సూచన: మీ స్పందనను బ్లాగ్ పోస్టు దిగువన గల కామెంట్స్ బాక్స్ లో వ్రాయ గలరు. ఇతర సమాచారం కొరకు suryvulimiri@gmail.com కు వ్రాయగలరు.   

ఘంటసాల-భానుమతి పాడిన అరుదైన యుగళ గీతం - జీవన డోలీ! మధుర జీవన కేళీ - రక్షరేఖ చిత్రం నుండి

అక్కినేని నాగేశ్వర రావు, భానుమతి, అంజలీదేవి నటించిన జానపద చిత్రం రక్షరేఖ. ఈ చిత్రంలో మొత్తం పాటలు, పద్యాలు 16 దాకా ఉన్నాయి. అయితే కొన్ని మాత్రమె అందుబాటులో వున్నాయి. అందులో ఘంటసాల మాస్టారు పాడినవి మూడు పాటలు. ప్రస్తుతం ఈ పోస్టులో ఘంటసాల గారు భానుమతి  గారితో పాడిన మధురమైన యుగళగీతం - "జీవన డోలి, మధుర జీవన కేళీ" పొందు పరుస్తున్నాను. ఈ చిత్రం యొక్క ఆంగ్ల సమీక్ష లభ్యం అవుతోంది.

 

        చిత్రం:         రక్షరేఖ (1949)

        రచన:         బలిజేపల్లి లక్ష్మీకాంతం

        సంగీతం:      ఓగిరాల రామచంద్రరావు, హెచ్.ఆర్.పద్మనాభ శాస్త్రి

        గానం:         ఘంటసాల, పి.భానుమతి  

        ఘంటసాల:   జీవన డోలీ! జీవన డోలీ! మధుర జీవన కేళీ

                        ఇదే ప్రేమ సుధా వాహినీ!

        ఇద్దరు:        ఓ! ప్రియా తేలుదమే హాయిగా     

                        జీవన డోలీ! జీవన డోలీ! మధుర జీవన కేళీ

                        ఇదే ప్రేమ సుధా వాహినీ!

                        ఓ! ప్రియా తేలుదమే హాయిగా

        ఘంటసాల:   జీవన డోలి

        భానుమతి:   ఓ.. ఓ. ఓ.. ఓ..

                        నీవే సరంగువి! ప్రేమ కేళి డోలికి                    | నీవే |

                        ఆనంద వాహినిలో హాయి సాగి పోవగా

                        ఓ! ప్రియా తేలుదమే హాయిగా జీవన డోలి

        ఘంటసాల:   ఆ..ఆ.

                        నీవే చుక్కానివిగ నడుపు అదో ప్రేమ నగరి!       | నీవే |

                        ఓ!.. చెలీ చేరుదమే హాయిగా       జీవన డోలి

        భానుమతి:   పున్నమ రేయి! పాల వెన్నెలలో హాయి           | పున్నమ |

                        పోనిమ్మా సరాసరి డోలికా

                        ఓ! మనోహరా! ఓ! మనోహరా! (2)

                        ఓ! ప్రియా తేలుదమే హాయిగా జీవన డోళి

        ఘంటసాల:   వలి పూల గాలి సాగే

        భానుమతి:   సుమ డోలి ఉయ్యాలూగే

        ఘంటసాల:   వలి పూల గాలి సాగే

        భానుమతి:   సుమ డోలి ఉయ్యాలూగే 

                        చెలీ చంద్రికా! అదే ప్రేమనగరీ       (2)

                        ప్రేమసఖా

        ఘంటసాల:   ప్రేమ సఖీ

        భానుమతి:   ప్రేమ సఖా చేరుదమా

        ఘంటసాల:   ప్రేమ సఖీ చేరుదమే

        ఇద్దరు:        ఓ ప్రియా! చేరుదమే హాయిగా                                     

                        జీవన డోలీ! జీవన డోలీ! మధుర జీవన కేళీ

                        ఇదే ప్రేమ సుధా వాహినీ!

                        ఓ! ప్రియా తేలుదమే హాయిగా జీవన డోలీ!
గమనిక: ఈ పాట సాహిత్యాన్ని PDF file గ download చేసుకోవడానికి దిగువనగల printfriendly ని click చేసి save చేసుకోవచ్చును.Thanks to GVS Sastry garu for the audio-video clip.