సముద్రాల జూనియర్ కు గేయ రచయితగా బ్రతుకు తెరువు నిచ్చిన పాట

1953 సంవత్సరంలో విడుదలైన భాస్కర్ ప్రొడక్షంస్ సంస్థ నిర్మించిన బ్రతుకు తెరువు చిత్రం నుండి ఘంటసాల పాడిన "అందమే ఆనందం " అనే ఈ ఏకగళం  రచన సమురాల జూ., స్వరపరచినది  ఘంటసాల. ఈ చిత్రంలో తారాగణం అక్కినేని, సావిత్రి, ఎస్.వి రంగారావు, శ్రీరంజని. ఈ చిత్రానికి నిర్మాత కె.భాస్కరరావు మరియు దర్శకుడు పి.రామకృష్ణ.

సముద్రాల జూనియర్

బహుళ ప్రజాదరణ పొందిన "అందమె ఆనందం" పాట గురించి ఆ పాటను వ్రాసిన మహానుభావుడు, సినీ సాహిత్య సముద్రాలలో ఒకరైన శ్రీ సముద్రాల జూనియర్ (రామానుజాచార్య) గారు ఏమన్నారంటే "యాభై మూడులో బ్రతుకు తెరువు వచ్చింది, నాకు బ్రతుకు తెరువు ఇచ్చింది. అందమే ఆనందం అన్న పాట నన్ను గేయ రచయితను చేసింది".  ఈ పాటకు ముందు సముద్రాల గారి ఉపోద్ఘాతం తో ఉన్న వీడియోను చూసి ఆనందించండి. అనువుగా మీకు ఎడమ ప్రక్క పాట సాహిత్యం ఇచ్చాను.  ఇందులో సావిత్రి చూపించిన హావ భావాలు ఎలాంటి నాయకుడినైనా సమ్మోహితుల్ని చేస్తుందంటే అందులో అతిశయోక్తి, ఆశ్చర్యం లేదు.

ఈ పాట గురించి కొన్ని ఆసక్తికరమైన విశేషాలు డా.వి.వి.రామారావు గారు రచించిన “అందమె ఆనందం” పుస్తకం నుండి సేకరించడమైనది. సముద్రాల రామానుజాచార్య గారు “అందమే ఆనందం ఆనందమే జీవితమకరందం” పల్లవి తరువాత “సురనందన వనమాకందం” అనే పంక్తిని అనుపల్లవిగా వ్రాశారట. అయితే ఘంటసాల మాస్టారు ఈ పంక్తి అవసరం లేదు అని తీసేసి బాణీ కట్టారట. ఇది సముద్రాల జూనియర్ గారు ఒక ఆకాశవాణి ప్రత్యేక జనరంజని కార్యక్రమంలో చెప్పారు అయితే నిజానికి ఆయన వేరే సాహిత్యం ఇచ్చారట ముందు. కాని దర్శకుడు రామకృష్ణకు అది నచ్చక ఇంకోటి వ్రాయమని చెప్తే అప్పుడు సముద్రాల జూనియర్ గారు బయటకు వచ్చి బీచ్ వైపు నడుస్తూ వెళ్ళారట.  అలా వెళ్తూ సూర్యాస్తమయాన్ని నీలి సముద్రపు అందాన్ని చూసి వెంటనే ఆయనకి ‘పడమట సంధ్యారాగం” అని మనసులో తట్టి దాన్ని ఎత్తుకొని పది నిమిషాల్లో పాట పూర్తి చేశారంట. మరునాడు  ఘంటసాల గారు గంటలో దానిని భీంపలాస్ రాగంలో స్వరపరిచారట. సముద్రాల జూనియర్ గారి ప్రత్యేకత ఏంటంటే ఈ గీతం చందోభరితమైన అంత్యప్రాసల అలంకార విశేషాలు - మకరందం, సంధ్యారాగం, పరాగం, మోహనరాగం, తరంగం, సారంగం వంటి మ’కార పదాలతో మృదు మధురంగా వ్రాసారు. అది మాస్టారి గళంలో అమృతమై, వీనులవిందుగా వినిపిస్తుంది. ఈ పాటను మాస్టారు దీపలాస రాగంలో స్వరపరిచారు. 

వీడియో మూలం: ఘంటసాల గానామృతం

M#031	S#01	అందమె ఆనందం
	నిర్మాణం:	భాస్కర్ ప్రొడక్షన్సు
	చిత్రం:	బ్రతుకు తెరువు-195౩
	రచన:	సముద్రాల జూనియర్
	సంగీతం:	ఘంటసాల
	గానం:	ఘంటసాల
ప.	ఘంటసాల:	అందమె ఆనందం
		అందమె ఆనందం
		ఆనందమె జీవిత మకరందం
		అందమె ఆనందం
		ఆనందమె జీవిత మకరందం
		అందమే ఆనందం
చ.		పడమట సంధ్యారాగం
		కుడియెడమల కుసుమపరాగం
		పడమట సంధ్యారాగం
		కుడియెడమల కుసుమపరాగం
		ఒడిలో చెలి మోహనరాగం
		ఒడిలో చెలి మోహనరాగం
		జీవితమే మధురానురాగం
		జీవితమే మధురానురాగం
		అందమె ఆనందం
		ఆనందమె జీవిత మకరందం
		అందమే ఆనందం
చ.		పడిలేచే కడలితరంగం
		ఓ.ఓ.ఓ.ఓ ఓ.ఓ ఓ.ఓ
		పడిలేచే కడలి తరంగం
		వడిలో జడిసిన సారంగం
		పడిలేచే కడలి తరంగం
		వడిలో జడిసిన సారంగం
		సుడిగాలిలో..ఓ..ఓ...
		ఓఓ ఓఓ ఓఓ ఓఓ ఓఓ
		సుడిగాలిలో ఎగిరే పతంగం
		జీవితమే ఒక నాటకరంగం
		జీవితమే ఒక నాటకరంగం
		అందమె ఆనందం
		ఆనందమె జీవిత మకరందం
		అందమె ఆనందం
		ఓఓఓ ఓఓఓ ఓఓ ఓఓ ఓఓ ఓఓఓ
		ఓఓఓ ఓఓఓ ఓఓ ఓఓ ఓఓ ఓఓఓ
		ఓఓ ఓఓ ఓఓ ఓఓఓ
		ఓఓ ఓఓ ఓఓ ఓఓఓ

వాతాపి గణపతిం భజే !

	చిత్రం:	వినాయక చవితి
	రచన:	శ్రీ ముత్తుస్వామి దీక్షితార్
	గానం:	ఘంటసాల

	పల్లవి:	వాతాపి గణపతిం భజే హం
		వాతాపి గణపతిం భజే హం
		వాతాపి గణపతిం భజే హం
		వారణాస్యం వరప్రదం శ్రీ
		వారణాస్యం వరప్రదం శ్రీ	||వాతాపి||
	అనుపల్లవి:	భూతాది సంసేవిత చరణం
		భూతభౌతికా ప్రపంచభరణం
		వీత రాగిణం వినుత యోగినం
		విశ్వకారణం విఘ్నవారణం	||వాతాపి||
	చరణం:	పురా కుంభసంభవ మునివరా
		ప్రపూజితం త్రిభువన మధ్యగతం
		మురారీ ప్రముఖాద్యుపాస్థితం
		మూలాధారా క్షేత్రార్జితం
		పరాది చత్వారి వాగాత్మజం
		ప్రణవ స్వరూప వక్రతుండం
		నిరంతరం నిఖిల చంద్రఖండమ్
		నిజ వామకర విదృతేక్షు దండం
		కరాంబుజపాశ బీజాపూరం
		కలుషవిదూరం భూతాకారం
		హరాది గురుగుహ తోషిత బింబం
		హంసధ్వని భూషిత హేరంబం	||వాతాపి||

ఘంటసాల బ్లాగుకు స్వాగతం!

   

 శుక్లాంబరధరం  విష్ణుం శశి వర్ణం చతుర్భుజం

ప్రసన్న వదనం ధ్యాయేత్ సర్వ విఘ్నోప శాంతయే 

 ఘంటసాల

అమర గాయకుడు ఘంటసాల తెలుగు వారింట వెలసిన ఒక సంగీత తరంగం. వీనుల విందైన ఆ మహానుభావుని గానం వినడంలోను, ఆయన పాడిన  పాటలలోని సాహిత్యాన్ని ఆస్వాదించడం లోను, ఆ గాన గంధర్వుని గురించి తెలుసుకోవడంలోను, నాకు సమయం తెలియదు. ఆ మధుర స్మృతులను నలుగురితో పంచు కోవాలనే ఈ చిన్ని తాపత్రయం లో మీరంతా అండ దండలు అందిస్తారని ఆశిస్తూ 
 మాస్టారి ఒక వీరాభిమాని   
సూర్య నారాయణ వులిమిరి
అందరికీ వినాయక చవితి శుభాకాంక్షలు!