అలనాటి అద్భుతమైన పాట - పెళ్ళి చేసుకుని ఇల్లు చూసుకుని

బ్రహ్మచారి ముదిరినా, బెండకాయ ముదిరినా ఎందుకూ పనికిరావన్నారు మనవాళ్ళు. అందువలన, మగ పిల్లవాడు ఒక ఇంటివాడు ఎప్పుడవుతాడా అని కొందరు తలిదండ్రుల ఆరాటం. అదే కూతురు అయితే, పెళ్ళీడు కొచ్చిన ఆడపిల్ల గుండెల మీద కుంపటి, అది ఎప్పుడు దింపుకుంటామో అని ఆడపిల్లను కన్నవారికి ఆందోళన, ఆదుర్దా.  కాని పెళ్ళి మాట వచ్చేసరికి ఎవరి ఆలోచనలు వారివి.  కట్నాలు, కానుకలు ఏమిటని మగ పెళ్ళివారికి చర్చ అయితే, అవి ఎలా సమకూర్చాలని ఆడపెళ్ళివారికి సమస్య అవుతుంది. ఆ రోజుల్లోనే వరకట్నం నివారించాలని పలువురి సూచన. అఫ్ కోర్స్ ఆడపిల్లల తల్లిదండ్రులకనుకోండి. అలాంటి పరిస్థితుల్లో ఒక మగ మహారాజు (ఎన్‌.టి.ఆర్.) నడుం కట్టి, ముందుకొచ్చి, తన స్వానుభవాన్ని సందేశ రూపంలో తెలియజెప్పె చక్కని సన్నివేశం "పెళ్ళి చేసి చూడు" చిత్రంలోని టైటిల్ సాంగ్. మాస్టారు ఈ పెళ్లి పాటను కల్యాణి రాగంలో స్వర పరచి, సున్నితంగా, సుమధురంగా పాడి అజరామరం చేశారు. పెళ్ళిళ్ళు జరిగినప్పుడు కట్న, కానుకల ప్రసక్తి, చర్చ వచ్చినపుడు ఈ పాటను గుర్తు తెచ్చుకోనివారుండరు. ఈ పాట రచన పింగళి. విజయా సంస్థ నిర్మించిన విజయవంతమైన ఈ చిత్రానికి దర్శకులు ఎల్.వి.ప్రసాద్. 

	చిత్రం:	పెళ్ళి చేసి చూడు (1952)
	రచన:	పింగళి నాగేంద్ర రావు
	సంగీతం:	ఘంటసాల వెంకటేశ్వర రావు
	గానం:	ఘంటసాల వెంకటేశ్వర రావు
	సాకీ:	ఓ! భావి భారత భాగ్య విధాతలారా!
		యువతీ యువకులారా…
		స్వానుభవమ్మున చాటు నా సందేశమిదే..
		వారెవ్వా! తా ధిన్న తకధిన్న తాంగిడు తకధిమి తో
	పల్లవి:	పెళ్ళి చేసుకుని యిల్లు చూసుకుని
		చల్లగ కాలం గడపాలోయ్ ఎల్లరు సుఖము చూడాలోయ్
		మీరెల్లరు హాయిగ ఉండాలోయ్
	సాకీ:	కట్నాల మోజులో తమ జీవితాలనే బలిచేసి
		కాపురములు కూల్చు ఘనులకు శాస్తి గాక!
		పట్నాల, పల్లెల దేశ దేశాల తమ పేరు చెప్పుకుని
		ప్రజలు సుఖపడగా..
	చరణం:	ఇంటా, బయటా జంట కవులవలె అంటుకు తిరగాలోయ్
		తరంపం	| ఇంటా బయటా |
		కంటిపాపలై దంపతులెపుడూ చంటిపాపలను సాకాలోయ్	| కంటి పాపలై |
		పెళ్ళి చేసుకుని..
		పెళ్ళి చేసుకుని యిల్లు చూసుకుని
		చల్లగ కాలం గడపాలోయ్ ఎల్లరు సుఖము చూడాలోయ్
		మీరెల్లరు హాయిగ ఉండాలోయ్
	సాకీ:	నవ భావములా.. నవ రాగములా.. ఆ..ఆ..ఆ…
		నవ జీవనమే నడపాలోయ్
	చరణం:	నవ భావములా నవ రాగములా నవ జీవనమే నడపాలోయ్
		భావ కవులవలె ఎవరికి తెలియని ఏవో పాటలు పాడాలోయ్	| భావ కవుల |
		తా ధిన్నా తకధిన్నా తాంగిడతక తథిగిణ తోం

ఐహిక సుఖము క్షణికము సుమ్మ - సతీ సక్కుబాయి నుండి ఘంటసాల

మహారాష్ట్రలోని షోలాపూర్ జిల్లాలో గల పండరిపుర క్షేత్రానికి సమీపంలో నివసించే ఒక కృష్ణ భక్తురాలు సక్కుబాయి. పాండురంగ విఠలుడు కొలువున్న పండరిపుర క్షేత్రం భీమానది ఒడ్డున వుండి. ఈ ప్రాంతంలో ఈ నది అర్ధ చంద్రాకారంలో వుంటుంది, అందువలన దీన్నే 'చంద్రభాగ' నది అంటారు. ఇక్కడకు శిరిడీ దగ్గరే. శిరిడి సాయినాథుని సాయంకాల ఆరతిలో 'శుద్ధ భక్తి చంద్రబాగా యావ పుండలీక జాగా' అని సూచించేవి ఈ నది, ఈ క్షేత్రం గురించే. కృష్ణ భక్తురాలైన సక్కుబాయి కథను చిత్రంగా చిన్ని బ్రదర్స్ (అంజలీ పిక్చర్సు) పతాకం పై అంజలీదేవి కథానాయిక పాత్రలో సతీ సక్కుబాయి చిత్రాన్ని 1965 లో నిర్మించారు.  విఠోబా భక్తిలో మునిగి తేలుతున్న సక్కుబాయి కారణజన్మురాలని గ్రహించిన మాధవస్వామి అనే సాధుపుంగవుడు (గుమ్మడి) ఆమెను పాండురంగ విఠలుని అనుగ్రహం పొందగలవని ఆశీర్వదిస్తాడు. అతనిని గురువుగా ఆశ్రయించి తనకు మోక్షమార్గం తెలియజేయమంటుంది సక్కుబాయి. ఆమెకు కృష్ణుని విగ్రహం ఇచ్చి ఆరాధించమని ఉపదేశిస్తాడు మాధవస్వామి. అత్త (సూర్యకాంతం), ఆడపడుచు (గిరిజ) తనను చిత్రహింసలు పెడుతున్నా, ఓర్చుకుని పాండురంగ విఠలునే నమ్ముకుంటుంది సక్కుబాయి. వైకుంఠం ను పండరి తోను, విరజానదిని చంద్రభాగ తోను, విష్ణువును పాండురంగనితో పోలుస్తూ, మాధవస్వామి తన శిష్యులకు భవబంధాలను, ఐహిక సుఖాలను త్యజించమని బోధించే పాటను ఘంటసాల మాస్టారు మధురాతి మధురంగా పాడారు. ఆ పాటను ఈ పోస్టులో పొందుపరుస్తున్నాను. ఈ చిత్రంలో పి.సుశీల అద్భుతమైన ఏకగళ గీతాలు (ఉదా.జయ పాండురంగ ప్రభో విఠలా), మాస్టారు పాడిన మరొక పాట (రంగా రంగా రంగాయనండి),  రెండు పద్యాలు కూడ వున్నాయి.  అంజలీదేవి భర్త పి.ఆది నారాయణ రావు సంగీత దర్శకులు. గీత రచన సముద్రాల రాఘవాచార్య, దర్శకత్వం వేదాంతం రాఘవయ్య. సక్కుబాయి భర్తగా ఎస్.వి.రంగారావు, ఆడపడుచు భర్తగా రేలంగి, శ్రీకృష్ణునిగా కాంతారావు నటించారు.

	చిత్రం:	సతీ సక్కుబాయి (1965)
	రచన:	సముద్రాల రాఘవాచార్య
	సంగీతం:	పి.ఆదినారాయణ రావు
	గానం:	ఘంటసాల వెంకటేశ్వర రావు
	పల్లవి:	ఐహిక సుఖము క్షణికము సుమ్మా
		హరి సంకీర్తన సేయుమా	| ఐహిక |
		నందనందనుని పొందున దొరకే
		ఆనందము యిల లేదు సుమా!	| నంద |
		ఐహిక సుఖము క్షణికము సుమ్మా
		హరి సంకీర్తన సేయుమా
	చరణం:	విరజా నది ఆ చంద్రభాగయే
		పరంధాముడా పాండు రంగడే
		విరజా నది ఆ చంద్రభాగయే
		పరంధాముడా పాండు రంగడే
		జనన, మరణ భయరహితంబైన
		శ్రీ వైకుంఠము పండరియే
		ఐహిక సుఖము క్షణికము సుమ్మా
		హరి సంకీర్తన సేయుమా
		ఐహిక సుఖము క్షణికము సుమ్మా

కృతజ్ఞతలు:  సమాచారము పొందుపరచిన ఘంటసాల గళామృతము - పాటల పాలవెల్లి మరియు వికిపీడియా బ్లాగులకు, యూ ట్యూబ్ వీడియో పొందుపరచిన MangoMusic వారికి కృతజ్ఞతలు.