ప్రేమించి పెళ్ళి చేసుకోమని ఎప్పుడో చెప్పారు ఆరుద్ర గారు

పెద్దలు కుదిర్చిన సంబంధాలు చేసుకోవడం ఒకప్పటి ఆనవాయితీ. అయితే కాలానుగుణంగా ఆ భావనలో మార్పులు వచ్చాయి. ప్రేమించి పెళ్ళిచేసుకోవడం అన్నది ఈ రోజు రివాజు. అయితే ఈ ప్రక్రియ పురాణాలలోను, ఇతిహాసాలలోనూ ఉంది. ఉదాహరణకు నలుడు దమయంతిని, శ్రీకృష్ణుడు రుక్మిణిని ప్రేమించి పెళ్ళాడారు.  దానిని పురాణ పురుషులో లేక చక్రవర్తులోమాత్రమే చేయగలరు అనే తలంపు ఉండేది. కాని ఇది సగటు వ్యక్తి తన జీవిత భాగస్వామిని ఎన్నుకోవడంలో ఈనాడు ఈ రీతి బహు ప్రతీతి. ఈ ప్రేమ సందేశాన్ని అభ్యుదయ కవి ఆరుద్ర (భాగవతుల సదాశివశంకర శాస్త్రి ) ఆత్మగౌరవం చిత్రం ద్వారా అందించారు. ముఖ్యమైన విషయం ఏమిటంటే ఈ చిత్రం కళాతపస్వి పద్మశ్రీ కె. విశ్వనాథ్ (కాశీనాథుని విశ్వనాథ్) కు దర్శకునిగా తొలి చిత్రం.రసాలూరు రాజేశ్వరంలో ఘంటసాల ఆలపించిన ఈ గీతాన్ని ఆలకించి ఆనందించండి.

ఆడియో మూలం: ఘంటసాల గాన చరిత

		చిత్రం:	ఆత్మ గౌరవం (1965)
		సంగీతం:	ఎస్. రాజేశ్వరరావు
		రచన:	ఆరుద్ర
		గానం:	ఘంటసాల
		సాకీ.	ఓ..సోదర సోదరీమణులారా..
			ఆదరించి నామాట వింటారా..
		స్త్రీ కంఠం:	వింటాం. చెప్పు.
		పల్లవి:	ప్రేమించి పెళ్ళిచేసుకో నీ మనసంత హాయి నింపుకో
			ప్రేమించి పెళ్ళి చేసుకో..
		చరణం:	వరుని వలపేమిటో, వధువు తలపేమిటో
			తెలుసుకోలేక పెళ్ళిళ్ళు జరిపించినా	| వరుని |
			తెలిసి కట్నాలకై బతుకు బలిచేసినా
			కడకు మిగిలేది ఎడమోము పెడమోములే	| ప్రేమించి |
		చరణం:	మనిషి తెలియాలిలే, మనసు కలవాలిలే
			మరచిపోలేని స్నేహాన కరగాలిలే	| మనిషి |
			మధుర ప్రణయాలు మనువుగా మారాలిలే
			మారి నూరేళ్ళ పంటగా వెలగాలిలే	| ప్రేమించి |
		చరణం:	నలుడు ప్రేమించి పెళ్ళాడె దమయంతిని
			వలచి రుక్మిణియె పిలిపించె శ్రీకృష్ణుని	| నలుడు |
			తొలుత మనసిచ్చి మనువాడె దుష్యంతుడు
			పాత ఒరవళ్ళు దిద్దాలి మీరందరూ	| ప్రేమించి |