ఏభయ్ ఏడేళ్ళ క్రిందటి ఘంటసాల గారి "నందామయా గురుడ నందామయా" పాట ఈ నాటికీ ఎవర్ గ్రీన్

సంఘం లో గొప్ప వ్యక్తులుగా చలామణి అవుతూ, ఎన్నో అరాచకాలను చేస్తున్న ప్రముఖుల నిజ స్వరూపాన్నిబయట పెట్టే ప్రయత్నంగా ఒక చక్కని సందేశాన్ని జోడించి తీసిన చిత్రం "పెద్ద మనుషులు". దీనికి మూలం "హెన్రిక్ ఇబ్సన్" రచించిన "ది పిల్లర్స్ అఫ్ సొసైటీ" అనే ఆంగ్ల నాటకం. ఈ చిత్రంలో మునిసిపాలిటీ చైర్మన్ గా ప్రతినాయకపాత్రలో నటించినది శ్రీ జంధ్యాల గౌరీనాథ శాస్త్రి గారు కాగా అతని జట్టులో ఇంకో ముగ్గురు చెడ్డ వ్యక్తులు, వెరసి దుష్ట చతుష్టయం ఇందులోని ప్రతినాయకులు. అయితే చైర్మన్ గారి తమ్మునిగా "తిక్క శంకరయ్య" పాత్రలో నటించిన రేలంగి గారికి ఈ పాత్ర ఎంతో పేరు తెచ్చింది. ఈ చిత్రం యొక్క టైటిల్ సాంగ్ లో చక్కని సందేశాన్ని కొసరాజు గారు వ్రాసారు. ఈ పాట పోతులూరి వీరబ్రహ్మం గారి సూక్తులలాగ భవిష్యత్తును సూచిస్తుంది. ఆనాటి ఈ పాట ఈనాటి రాజకీయాలకు కుడా వర్తిస్తుంది. అందుకే ఇది ఎవర్ గ్రీన్ అయింది.  పెద్దమనుషులు చిత్రం తొలి రజత కమలం పొందిన ఉత్తమ చిత్రం. టైటిల్స్ మొత్తం నడిచే ఎనిమిది చరణాల పాట "నందామయా గురుడ నందామయా". పాట పెద్దదయినా ప్రతి చరణంలోని భావం అక్షర సత్యం.  పాట చివర కొంత హాస్య సంభాషణ కూడా వుంది వీడియోలో. ఇందులో మరొక ఆణిముత్యం "శివ శివ మూర్తివి గణ నాథా". ఈ రెండు పాటలు ఘంటసాల మాస్టారు రేలంగి పాత్రకు పాడారు. ఈ చిత్రం సినిమా సమీక్ష కొరకు ఇక్కడ క్లిక్ చేయండి.      

Thanks to Priyanshu Doneparthy for up loading the song to You Tube

చిత్రం:         పెద్ద మనుషులు (1954)

రచన:         కొసరాజు రాఘవయ్య చౌదరి

సంగీతం:      ఓగిరాల రామచంద్ర రావు, అద్దేపల్లి రామారావు

గానం:         ఘంటసాల వెంకటేశ్వరరావు

ఘంటసాల:   నందామయా గురుడ నందామయా!

                ఆనందదేవికి నందామయా!

బృందం:       నందామయా గురుడ నందామయా!

                ఆనందదేవికి నందామయా!

ఘంటసాల:   స్వారాజ్య యుద్ధాన జయభేరి మ్రోగించి

                శాంతమూర్తులు అంతరించారయా

                స్వాతంత్ర్య గౌరవము సంతలో తెగనమ్ము

                స్వార్ధ మూర్తులు అవతరించారయా               

బృందం:       నందామయా గురుడ నందామయా!

                ఆనందదేవికి నందామయా!

ఘంటసాల:   వారు వీరౌతారు, వీరు వారౌతారు

                మిట్ట పల్లాలేకమౌతాయయా

                తూరుపూ దిక్కునా తోకచుక్కా పుట్టి

                పెద్ద ఘటముల కెసరు పెట్టేనయా

బృందం:       నందామయా గురుడ నందామయా!

                ఆనందదేవికి నందామయా!

ఘంటసాల:   కనకాద్రి శిఖరాన శునకమ్ము సింహమై   

                ఏడుదీవుల రాజ్యమేలేనయా

                గుళ్ళు మ్రింగేవాళ్ళు, నోళ్ళు గొట్టేవాళ్ళు

                ఊళ్ళో చెలామణీ అవుతారయా

బృందం:       నందామయా గురుడ నందామయా!

                ఆనందదేవికి నందామయా!

ఘంటసాల:   అ,ఆ లు రానట్టి అన్నయ్య లందరికి

                అధికార యోగమ్ము బడుతుందయా

                కుక్క తోకా పట్టి గోదావరీదితే

                కోటిపల్లీ కాడ తేలేరయా

బృందం:       నందామయా గురుడ నందామయా!

                ఆనందదేవికి నందామయా!

ఘంటసాల:   గొఱ్ఱెల్లు దినువాడు గోవింద గొడ్తాడు

                బఱ్ఱెల్లు తినువాడు వస్తాడయా

                పగలి చుక్కలు మింట మొలిపించునంటాడు

                నగుబాట్లు పడి తోక ముడిచేనయా

బృందం:       నందామయా గురుడ నందామయా!

                ఆనందదేవికి నందామయా!

ఘంటసాల:   అప్పు చేసినవాడు పప్పు కూడు తిని

                ఆనందమయుడౌచు తిరిగేనయా

                అర్ధమిచ్చినవాడు ఆకులలములు మేసి

                అన్నానికాపన్నుడౌతాడయా

బృందం:       నందామయా గురుడ నందామయా!

                ఆనందదేవికి నందామయా!

ఘంటసాల:   దుక్కి దున్నేవాడు భూమి కామందౌచు

                దొరబాబు వలే చలాయిస్తాడయా

                అద్దెకుండేవాడె యింటి కామందునని

                ఆందోళనము లేవదీస్తాడయా

బృందం:       నందామయా గురుడ నందామయా!

                ఆనందదేవికి నందామయా!

ఘంటసాల:   ఆంబూరు కాడ యాటంబాంబు బ్రద్దలై

                తొంబ తొంబగ జనులు చచ్చేరయా

                తిక్క శంకరస్వామి చెప్పింది నమ్మితే

                చిక్కులన్నీ తీరిపోతాయయా                               | తిక్క శంకర |

బృందం:       నందామయా గురుడ నందామయా!

                ఆనందదేవికి నందామయా!

                ఆనందదేవికి నందామయా!