“స్వస్తి ప్రజాభ్యః పరిపాలయంతాం” శ్లోకం - కంచుకోట (1967) చిత్రం నుండి ఘంటసాల గళంలో

ఈ శ్లోకం 1967 లో విశ్వశాంతి బ్యానర్ మీద యు.విశ్వేశ్వరరావు నిర్మించి, సి.ఎస్. రావు దర్శకత్వం వహించిన “కంచుకోట” చిత్రం లోనిది. ఈ చిత్రానికి సంగీతం కె.వి. మహదేవన్ అందించారు.  ఈ చిత్రంలో ఎన్.టి.రామారావు, కాంతారావు, సావిత్రి, దేవిక, ఉదయకుమార్ ప్రధాన తారాగణం. ఈ శ్లోకం నేపథ్యంలో చిత్రం ఆఖరులో ఎన్.టి.ఆర్. పట్టాభిషేకం సమయంలో చిత్రీకరించారు.  ఈ శ్లోకం గుఱించి కొన్ని విషయాలు ఇక్కడ తెలుసుకుందాం.

ఈ మంగళ శ్లోకం ఋగ్వేదం (స్వస్తి సూక్తం) మరియు శ్రీ మద్రామాయణం ఉత్తరకాండ ముగింపులోని మంగళ శ్లోకాల నుండి స్వీకరించబడింది. సాధారణంగా సభలు, పూజలు, యజ్ఞాలు ముగిసేటప్పుడు విశ్వశాంతి కోసం ఈ మంగళ శ్లోకాన్ని పఠిస్తారు. సమస్త ప్రాణికోటికి శుభం కలగాలని, పాలకులందరూ ధర్మబద్ధంగా పాలన అందించాలని, ప్రపంచంలో శాంతి సౌఖ్యాలు వర్ధిల్లాలని కోరుకుంటూ చెప్పే మంగళాశాసనం ఇది. అందుకేనేమో విశ్వేశ్వరరావు గారు తమ బ్యానర్ ను "విశ్వశాంతి" గా ఎన్నుకున్నారు.

M#000	S#00	స్వస్తి ప్రజాభ్యః పరిపాలయంతాం
	చిత్రం:	కంచుకోట (1967)
	మూలం:	సాంప్రదాయక స్వస్తివాచకం
	గానం:	ఘంటసాల
	సంగీతం:	కె.వి. మహదేవన్
	ఘంటసాల :	స్వస్తి ప్రజాభ్యః పరిపాలయంతాం
		న్యాయేన మార్గేణ మహీం మహీశాః
		గోబ్రాహ్మణేభ్యః శుభమస్తు నిత్యం
		లోకాః సమస్తాః సుఖినో భవంతు
		ఓం శాంతి శాంతి శాంతిః

తాత్పర్యం: పాలకులు న్యాయమైన మార్గంలో భూమిని పరిపాలించాలి. ప్రజలందరికీ శ్రేయస్సు కలగాలి. గోవులకు, బ్రాహ్మణులకు (సమసమాజానికి దిశానిర్దేశం చేసే జ్ఞానులకు) ఎల్లప్పుడూ శుభం కలగాలి. ఈ విశ్వంలో ఉన్న సమస్త ప్రాణులు సుఖసంతోషాలతో వర్ధిల్లాలి.

కృతజ్ఞతలు : చిత్రంలోని పాటల వివరాలను "ఘంటసాల గళామృతము" బ్లాగ్ ద్వారా అందించిన శ్రీ కొల్లూరు భాస్కరరావు గారికి, సాహిత్యాన్ని"శతాబ్దిగాయకుడు ఘంటసాల" పుస్తకము ద్వారా అందించిన శ్రీ చల్లా సుబ్బారాయుడు గారికి హృదయపూర్వక నమస్కారములు.