చెయ్యెత్తి జై కొట్టు తెలుగోడా - 'పల్లెటూరు' చిత్రం నుండి ఘంటసాల, బృందం

నేడు ఎన్‌.టి.ఆర్. 93వ జయంతి

తెలుగుజాతిని జాగృతము చేసి ఆరుకోట్ల ఆంధ్రులను తమ ఆత్మాభిమానాన్ని కాపాడుకోమని చెప్పిన మన అభిమాన నటుడు నందమూరి తారక రామారావు 93 వ జయంతి మే 28 న. చాలమందికి తెలియని విషయం ఏమిటంటే భూకైలాస్ చిత్రం విడుదలైన తరువాత రామారావు గారిని విశ్వవిఖ్యాత నటసార్వభౌముడు అని ఆశీర్వదించినది శ్రీ కంచి స్వామీజీ.  అదే ఎన్‌.టి.ఆర్. కు బిరుదుగా స్థిర పడింది. ఆది నుండే ఆయన నటించిన మనదేశం, పల్లెటూరు వంటి చిత్రాలలోని గీతాలు సందేశాత్మకమై ఆయన భవిష్యత్తును సూచించాయని ఇప్పుడనిపిస్తుంది. కాని అప్పుడు తోచివుండదు చాల మందికి.  1952 లో విడులయిన పల్లెటూరు చిత్రం నుండి తెలుగుదనమును కాపాడమని తెలుగువారంతా ఒక తల్లి బిడ్డలేనని ప్రబోధించే వేములపల్లి శ్రీకృష్ణ వ్రాసిన దేశభక్తి గీతం "చేయెత్తి జై కొట్టు తెలుగోడా".  మహాకవి శ్రీశ్రీ వ్రాసిన "పొలాలనన్నీ హలాల దున్నీ" మరియు సుంకర వాసిరెడ్డి వ్రాసిన "ఆంధ్రుడా లేవరా ఆంధ్రుడా బిరాన" వంటి ప్రబోధ గీతాలు ఈ చిత్రం లోనివే.

వేములపల్లి శ్రీకృష్ణ

వేములపల్లి శ్రీకృష్ణ గారు 1968-72 మధ్య "విశాలాంధ్ర" పత్రికకు సంపాదకునిగా పనిచేసారు. ఆయన సి.పి.ఐ. పార్టీకి చెందిన నాయకులు మరియు ఎన్నో కార్మిక ఉద్యమాలు నడిపారు. వారు వ్రాసిన ఈ పాటను ఘంటసాల స్వీయ సంగీత దర్శకత్వంలో ఒక ఉత్తేజితమైన బృంద గానంగా స్వరపరిచారు. ఈ పాటనే మరికొన్ని చరణాలతో తరువాత రామారావు గారు ఎన్నికల ప్రచారానికి ఉపయోగించారు. ఎన్‌.టి.ఆర్. 93వ జన్మదినోత్సవ సందర్భంగా "చేయెత్తి జైకొట్టు తెలుగోడా" గీతం యొక్క దృశ్యఖండికను, సాహిత్యాన్ని ఇక్కడ పొందుపరుస్తున్నాము.

		చిత్రం:	పల్లెటూరు (1952)
		రచన:	వేములపల్లి శ్రీకృష్ణ
		సంగీతం:	ఘంటసాల
		గానం:	ఘంటసాల, బృందం
	పల్లవి:	ఘంటసాల:	చేయెత్తి జైకొట్టు తెలుగోడా!
			గతమెంతో ఘనకీర్తి గలవోడా!
	చరణం:	ఘంటసాల:	వీర రక్తపుధార, వారవోసిన సీమ -2
			పలనాడు నీదెరా, వెలనాడు నీదెరా ఆ.. -2
			బాలచంద్రుడు చూడ ఎవరోడోయ్
			తాండ్ర పాపయ గూడ నీవోడోయ్
	చరణం:		నాయకి నాగమ్మ, మల్లమాంబా, మొల్ల -2
			మగువ మాంచాల నీతోడ బుట్టినవోళ్ళే -2
			వీరవనితలగన్న తల్లేరా!
			ధీరమాతల జన్మభూమేరా!
	చరణం:	ఘంటసాల:	కల్లోల గౌతమీ
		బృందం:	ఆ..ఆ..
		ఘంటసాల:	వెల్లువల కృష్ణమ్మ
		బృందం:	ఆ..ఆ..
			కల్లోల గౌతమీ, వెల్లువల కృష్ణమ్మ
			తుంగభద్రా తల్లి, పొంగి బారిన చాలు -2
			ధాన్యరాశులె పండు దేశానా!
			కూడు గుడ్డకు కొదువ లేదోయీ
	చరణం:		ముక్కోటి బలగమోయ్, ఒక్కటై మనముంటే..ఏ..
			ఇరుగు పొరుగులోన, వూరు పేరుంటాది -2
			తల్లి ఒక్కతే నీకు తెలుగోడా!
			సవతి బిడ్డల పోరు మనకేలా!
	చరణం:	ఘంటసాల:	పెనుగాలి వీచింది
		బృందం:	ఆ..ఆ..
		ఘంటసాల:	అణగారి పోయింది
		బృందం:	ఆ..ఆ..
		ఘంటసాల:	పెనుగాలి వీచింది – అణగారి పోయింది
			నట్టనడి సంద్రాన – నావ నిలుచుండాది -2
			చుక్కాని పట్టరా తెలుగోడా!..ఆ..
			నావ దరిజేర్చరా – మొనగాడా!
		బృందం:	చేయెత్తి జైకొట్టు తెలుగోడా!
			గతమెంతో ఘనకీర్తి గలవోడా!
			గతమెంతో ఘనకీర్తి గలవోడా!..ఆ.